Foto: TimHill/pixabay.com
Julle het Jesus Christus as Here erken en aanvaar. Tree nou op soos mense wat Hom regtig as Here ken. Julle verhouding met Hom moet so heg en intiem wees soos die band tussen ’n boom en die aarde waaruit dit groei. (Kolossense 2:6-7)
God het ons lief net soos ons is, maar Hy het ons té lief om ons te los net soos ons is, het Fulton Sheen gesê. Daar is maar één manier om elke dag núút te leef en in jou geloof te groei en dit is om Christus intiem te ken – om soos die wortelstelsel van ’n boom in die grond in Hom vasgeanker te wees.
Nou weet ons almal dat ons met tye dit nogal regkry om werklik naby aan God te leef, net om weer die volgende dag deur die winde van die lewe uit die noue verbintenis met Hom gewaai te word. Die wêreld het mos maar ’n manier om ons wég van God af te trek. Daarom moet ons met jaloesie waak oor ons kosbare Woordlees- en gebedstyd, ons intieme gesprekke met Hom en ons aanbidding saam met medegelowiges.
Bid elke dag dat sy lewende water jou sal vul en dat sy liefde jou geloof sterk sal maak.
Hou my ín U gewortel, Hemel-Vader.
