Gedagte vir die dag: God beproef sy eie werk

Argieffoto (Foto: Mirey2222/Pixabay)

“Dit is egter nie al nie. Ons verheug ons ook in die swaarkry, want ons weet: swaarkry kweek volharding, en volharding kweek egtheid van geloof, en egtheid van geloof kweek hoop; en dié hoop beskaam nie, want God het sy liefde in ons harte uitgestort deur die Heilige Gees wat Hy aan ons gegee het” (Romeine 5:3-5).

Skrifgedeelte
Romeine 5:1-11 (OAV)

Oordenking
Ons mag die ongelooflike glo. Dit wat vir die in-sonde-gevalle mens ondenkbaar en onvoorstelbaar is, is vir die verloste kind van God ʼn werklikheid.

Watter ongelooflike heerlikheid mag ons glo? Dat Christus op die regte tyd vir goddelose mense sterwe. Sodoende maak Hy ons sy mede-erfgename, kinders van God. God maak om Christus wil ʼn enorme groot belegging in elkeen van sy uitverkore kinders. Met daardie belegging is God elke dag aan die werk. Soms plaas Hy die belegging onder druk. Hy bring beproewinge oor sy kinders. Hy laat die wolke dik saampak en beskik gebeure en dinge wat ons nie sou verkies om te hê nie. Maar so werk die Vader met sy kosbare belegging in die klei-erdepotte. Die liefde wat Hy in ons harte uitstort, vermeerder Hy deur dinge weg te vat wat die liefde kan laat afkoel.

Is dorings en bossies deel van ons bestaan? Tref die een ding na die ander ʼn mens? Wees dan in geloof daarvan oortuig dat God sy werk in ons nie laat vaar nie. Die geloof wat Hy in sy kinders werk, hou Hy in stand. Dit is ʼn belofte. En sy beloftes word altyd nagekom.

• Hierdie kort oordenking is saamgestel deur dr. GJ Meijer (Oos-Moot). Dit het oorspronklik in die Almanak van die Gereformeerde Kerke van Suid-Afrika (GKSA) verskyn en word met toestemming van die GKSA Almanak se redaksie op Maroela Media gepubliseer.