Gedagte vir die dag: God word mens – ondenkbaar?

twee_mense_stap_sonsondergang_boekvat.jpg

Foto: jorgeschulz.wordpress.com

Toe sy ouers Hom sien, was hulle verslae …: “Kind, waarom het jy so met ons gemaak? Kyk, jou vader en ek het met angs na jou gesoek.” Maar Hy antwoord hulle: “Waarom het u na My gesoek? Het u nie geweet dat Ek in die huis van my Vader moet wees nie?” (Lukas 2:48-49)

Toe klein Siebert, my seun, twee jaar oud was, het hy in ’n winkelsentrum weggeraak. Dit was angswekkend. Die bykans 25 minute wat hy weg was, het soos ʼn ewigheid gevoel. Koerantopskrifte van vermiste kinders het deur my kop gemaal, ek wou gek word en kon skaars asemhaal; ek het op my knie neergeval en gebid die Here moet my tog die soort lyding spaar.

Dit was vreesaanjaend, maar wonderbaarlik het ’n vrou met hom op haar heup na my toe aangestap gekom. Ek kon die Here nie genoeg prys nie.

Ek kan verstaan dat Josef en Maria ontsteld was omrede Jesus as twaalfjarige sommer so verdwyn het. Bekommernis oor hulle seun se welstand het hulle sekerlik opgevreet in die tyd wat hulle angstig na Hom gesoek het. Toe hulle Hom kry, antwoord Jesus hulle ewe kalm: “Het u nie geweet dat Ek in die huis van my Vader moet wees nie?” Met hierdie gebeure wil Lukas beklemtoon dat Jesus reeds van sy jeugjare af God se belange eerste gestel het. Hy was gehoorsaam aan sy ouers en het saam met hulle teruggegaan na Nasaret en nog jare lank onder hulle gesag gebly, maar God was prioriteit een in sy lewe. Die gedeelte dui op die besondere verhouding tussen Jesus en sy hemelse Vader.

Jesus het as twaalfjarige die geleerdes met sy wysheid en insig in die tempel verstom. Hy was nie meer die seun na wie Maria benoud gesoek het nie, maar die man, Messias.

Hierdie verhaal illustreer so mooi die wonder van God wat mens geword het om sodoende ons skuld te betaal. Hy was waarlik God, maar ook waarlik mens, nie altyd verstaanbaar vir ons nie. Soos ons het Hy op die stofpaaie van hierdie aarde gestap. Hy het lyding en verwerping leer ken en daarom kan Hy ons met deernis troos wanneer ons hartseer of bekommerd is.

Bron:
Stilword vir vroue deur Liesel Krause-Wiid
Uitgewer: Carpe Diem Media

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Een kommentaar

Nel ·

…Maar sou Hy dan juis nie geweet het van die angs waardeur sy ouers gegaan het nie(?)

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.