Foto: pixabay.com
Ek laat vir julle vrede na; my vrede deel Ek met julle. Ek gee nie soos die wêreld gee nie. (Johannes 14:27)
In hierdie teksgedeelte is Jesus besig om sy dissipels voor te berei oor sy weggaan met die gerusstelling dat Hy vrede vir hulle nalaat. ’n Ander soort vrede. Want, het Hy dikwels gesê, sy soort vrede is nie die afwesigheid van konflik nie. Nee, soms, wanneer dinge teen sy waardes soos respek, menslikheid, goedheid, vergifnis en deernis ingedruis het, het Hy hom ernstig daaroor uitgespreek. Goeie konflik veroorsaak.
Die vrede wat Hy bring, is die teenwoordigheid van genade en liefde. Ook wanneer ons soms op ons waardes moet vasstaan, kan ons vrede hê wanneer ons die verskille uitleef binne sy wil en met sy soort wysheid en begrip. Daarom moet ons gereeld bid vir die onderskeidingsvermoë van wanneer goeie konflik nodig is en die genade om te weet hoe om dit te hanteer.
Haal sommer net op hierdie oomblik diep asem en neem met elke asemteug die Vredevors se soort vrede in.
Heilige, ek verlang na u diep vrede. Om my. In my. In my hart. In my gedagtes. My dade. En veral in my woorde.
