Vandag is Braaidag! Maak hierdie lekker slaaie saam met jou braaivleis en braaibroodjie.
Slaai met avokado, nartjies en gekaramelliseerde pekanneute
Lewer 6 porsies
Bestanddele
- 6 ryp avokado’s, ontpit en opgesny
- 1 rooiui, gesny
- 2 nartjies, opgebreek in segmente
- 1 lemoen, in segmente gebreek
- 100 g gekaramelliseerde pekanneute
- mikro-kruie vir versiering
Papawersaadslaaisous
- ½ k heuning
- ¼ k appelasyn
- ¼ k papawersaad
Metode
- Meng al die slaaisousbestanddele deur dit in ʼn bottel te sit en te skud tot gemeng.
- Marineer die skywe rooiui vir 5-10 minute in die slaaisous.
- Rangskik die avokado op ʼn slaaibord saam met die nartjie- en lemoenhuisies en pekanneute. Giet die slaaisous en die gemarineerde uie oor die slaai.
- Bedien dadelik.
Bron: South African Avocado Growers’ Association (SAAGA)
Slaai met artisjokke, palmharte en aspersies
Lewer 6-8 porsies
Bestanddele
- 800 g (2 blikkies) artisjokke, gedreineer en in stukke gesny
- 800 g (2 blikkies) palmharte, gedreineer en in stukke gesny
- 410 (1 blik) aspersiepunte, gedreineer
- 200 g (1 pakkie) swart olywe
- ½ kop blaarslaai, gewas en gekap
Romerige slaaisous
- 150 ml kondensmelk
- 50 ml suurlemoensap
- 3 ml mosterdpoeier
- Knippie rooipeper
- 50 ml room
Metode
- Meng al die slaaibestanddele in ʼn slaaibak.
- Meng die sousbestanddele saam en giet oor die slaai.
- Sit dadelik voor.
Bron: Braaitreffers deur Hannetjie Joubert
Chakalaka-boontjieslaai met eiers
Lewer 2-4 porsies
Bestanddele
- 60 ml (¼ k) botter
- ½ rooiui, fyngekap
- 1 knoffelhuisie, fyngekap
- 2 tamaties, in blokkies
- ½ groen soetrissie, saadjies verwyder en grofgekap
- 4 boompies blomkool, gekap
- 1 wortel, geskil en gerasper
- 180 g gevriesde mieliepitte
- 1 rooi brandrissie, ontpit en gekap
- 5 ml (1 t) kerriepoeier
- 15 ml (1 e) gemaalde koljander
- Sout en peper na smaak
- 1 x 410 g gebakte boontjies in tamatiesous
- 3 groot eiers, hardgekook en in kwarte gesny
Metode
- Smelt die botter in ʼn braaipan en braai die uie en knoffel vir ʼn paar sekondes saam.
- Voeg die oorblywende bestanddele, behalwe die boontjie en eiers, by en prut oor ʼn lae hitte vir sowat 10 minute.
- Roer die boontjies in en prut tot dit warm is vir sowat 10 minute. Bedien met eierkwarte.
Bron: South African Poultry Association (SAPA)