Hierdie is dalk net die groenteresep waarvoor jou kleinding nie sy of haar neus optrek nie.
Bestanddele
Vulsel
- klont botter
- 1 ui, fyngekap
- 1 selderystingel, fyngekap
- 250 g (1 pakkie) sampioene, in skyfies gesny
- 4 murgpampoentjies, grofgerasper
- 1 rooi soetrissie, in blokkies gesny
- 50 g (½ pakkie) kasjoeneute, grofgekap
- 4 grasuie, gekap
- 2 skywe fetakaas, gekrummel
- varsgemaalde swartpeper
- 15 ml (1 e) sojasous
- 2,5 ml (½ t) bruinsuiker
Kors
- 250 g (½ pak) fillodeeg
- 125 g (¼ blok) botter, gesmelt
- tou om mee vas te bind
Metode
Stel oond op 180 °C.
Vulsel
- Smelt botter en soteer ui en seldery daarin tot sag.
- Voeg sampioene by en soteer tot sag. Gooi enige oortollige vloeistof af.
- Voeg murgpampoentjies en soetrissie by en soteer nog 5 minute.
- Voeg oorblywende bestanddele by en roer goed. Verwyder van hitte.
Kors
- Vou fillodeeg oop. Sny fillodeeg deur al die lae in vier dele.
- Bedek fillodeeg met skoon, klam vadoek.
- Verf gesmelte botter met kwassie oor een fillodeegblok. Plaas volgende fillodeegblok dwars bo-op. Smeer weer met botter. Draai om en verf ander kant ook met botter.
- Skep teelepelsvol van vulsel in middel van filloblokke. Vou punte bymekaar.
- Bind boonste gedeelte met toutjie vas. Plaas op gesmeerde bakplaat.
- Doen dieselfde met oorblywende bestanddele.
- Bak vir 20 minute of tot punte van fillodeeg goudbruin is.
Bron: Vinnig en Maklik
Uitgewer: Lapa