Resep: ‘Jan Braai’ se chakalaka

‘Jan Braai’ se chakalaka. (Foto: verskaf)

Daar is ’n driemanskap – boerewors, krummelpap (poetoepap) en chakalaka – wat die hoeksteen van Suid-Afrika se kulturele en braai-erfenis is. Net soos om boerewors te braai en krummelpap te maak, is chakalaka ook nogal eenvoudig en baie smaaklik.

Genoeg vir 6 mense

Bestanddele

• 3 sopies olyfolie
• 3 uie (opgekap)
• 3 knoffelhuisies (gekneus en opgekap)
• 1 teelepel fyn gemmer (vars gerasper)
• 2 vars brandrissies (opgekap)
• 3 soetrissies (enige kombinasie van groen, geel of rooi, ontpit en opgekap)
• 4 wortels (geskil en gerasper of opgekap)
• 2 lourierblare
• 1 sopie medium-sterkte kerriepoeier
• 1 sopie paprika
• 1 blikkie opgekapte tamaties
• 1 pakkie (50 g) tamatiepasta
• 1 blikkie sousboontjies
• sout en peper (na smaak)
• vars koljander (om mee te bedien)

Metode

1. Verhit die olie in jou potjie en braai die uie tot deurskynend.
2. Gooi die knoffel, gemmer, brandrissie, soetrissies, wortels en lourierblare by en roer saam met die uie rond.
3. Gooi nou die kerriepoeier en paprika by en braai vir nog ’n minuut om die speserye te rooster, maar gaan aan na die volgende stap voordat dinge brand.
4. Voeg nou die tamaties en tamatiepasta by en meng deeglik. Sit die deksel op en laat die potjie prut op medium‑ tot lae hitte vir 30 minute sodat die geure kan ontwikkel en die wortels en enige ander harde bestanddele kan sag kook.
5. Gooi die bone by, meng deur en laat prut vir nog 10 minute.
6. Proe en gooi sout en peper by as jy lus is.
7. Bedien met vars koljander en saam met krummelpap en gebraaide boerewors.

• Jan Braai vir Erfenis word weekliks op Saterdae om 19:00 op kykNET, DStv-kanaal 144, uitgesaai.