Outydse karringmelkbeskuit. (Foto: Lapa-uitgewers)
Tuisgemaakte karringmelkbeskuit soos jou ma dit destyds gemaak het.
Lewer ongeveer 90 stukke
Bestanddele
- 250 g margarien, opgesny
- 1,2 kg koekmeel
- 50 ml bakpoeier
- 10 ml kremetart
- 5 ml koeksoda
- 5 ml sout
- 625 ml karringmelk
- 200 g suiker
- 2 eiers
Metode
- Voorverhit die oond tot 180 °C en smeer drie middelgroot broodpanne (± 26 cm) goed met margarien.
- Plaas die margarien, koekmeel, bakpoeier, kremetart, koeksoda, suiker en sout in ʼn mengbak en vryf met die vingerpunte tot krummelrig. Maak ʼn holte in die middel.
- Giet die karringmelk en eiers in die holte van die meelmengsel en meng tot ʼn matige stywe deeg. Voeg nog karringmelk by indien nodig.
- Knie die deeg liggies op ʼn meelbestrooide oppervlak vir 1-2 minute tot glad.
- Vorm die deeg in eiergrootte balletjies en pak styf teen mekaar in die gesmeerde panne.
- Bak ongeveer 40 minute lank tot liggoudbruin en deurgaar as met ʼn metaalpen getoets word.
- Laat die beskuit ongeveer 5 minute in die panne afkoel en keer uit op ʼn afkoelrak om heeltemal af te koel.
- Breek of sny die beskuit in stukke en droog oornag in ʼn koel oond uit (60-70 °C).
Bron: Lekker & Vinnig: Beskuit
Uitgewer: Lapa
Hoe droog ek beskuit as ek n gasoond het?
Dit werk soortgelyk aan ‘n elektriese oond. Stel die oond op laag. Dit sal ook vinniger gebeur. So moenie dit langer as drie ure in die oond hou nie.
Yum! Iets om aan te smul so tussendeur.
Gaan defnitief self maak .Sal jul ophoogte hou met die resultate