Resep: Texas-styl speseryneute

Texas-styl speseryneute. (Foto: Lapa Uitgewers)

Probeer iets nuuts met hierdie speseryneute.

Lewer sowat 400 g of ongeveer 1 liter geroosterde neute.

Bestanddele

• 400 g ongesoute, gemengde neute of 100 g elk amandels, macadamia-, kasjoe- en pekanneute
• 15 ml botter of sonneblomolie

Speserymengsel

• 5 ml sout
• 10 ml bruinsuiker
• 5 ml paprika
• 5 ml fyn komyn
• 2 ml fyn koljander
• 1-5 ml brandrissiepoeier, rooipeper of gedroogde brandrissievlokkies

Metode

1. Voorverhit die oond tot 180 °C. Verhit die botter of olie en gemengde speserye in ʼn swaarboomkastrol en rooster 1 minuut lank oor matige hitte terwyl dit geroer word. Voeg die neute by en roer totdat dit egalig met speserye bedek is.
2. Plaas die neute op ʼn bakplaat, groot genoeg dat al die neute in een laag oor die bakplaat versprei kan word.
3. Bak 15 minute lank, en roer een of twee keer.
4. Laat dit afkoel en bere in ʼn lugdigte houer tot benodig, tot ʼn maand of twee.

Bron: Bêrekos
Uitgewer: Lapa