Gebruik hierdie resepte om ʼn heerlike bord kookkos Sondag te bedien.
Hoender-aartappels
Bestanddele
- 8 aartappels, geskil
- 1 ℓ hoenderaftreksel
- sout en peper na smaak
- 250 g botter
- 100 ml olie
Metode
- Sny die aartappels in kwarte en kook in die aftreksel tot net-net sag en laat afkoel.
- Verhit die botter en die olie, en braai die aartappels in die mengsel tot bros aan die buitekant. Hou eenkant.
- Die aartappels kan maklik weer verhit word.
Pampoenkoekies
Bestanddele
- 1 k pampoen, gekook
- 1 k koekmeel
- 2 t bakpoeier
- 1 eiers
- 2 e suiker
- ¼ k melk
- ½ t kaneel
- knippie sout
Sous
- 125 ml suiker
- 50 g botter
- 1 k room
- sout na smaak
Metode
Pampoenkoekies
- Meng al die bestanddele saam om ’n beslag te vorm. Laat effens rus.
- Braai in vlak olie tot ligbruin en gaar.
Sous
- Laat die suiker in ’n pan smelt, voeg eers die botter by en dan die room, en maak ’n sous.
- Bedien saam met die koekies.
’n Knypie sout laat die soet beter deurkom.
Lamsboud in olie
Bestanddele
- 1 ontbeende lamsboud
- genoeg olie om dit te bedek
- kruie van jou keuse soos roosmaryn en tiemie
Metode
- Plaas die lamsboud in ’n groot pot, bedek met olie en die kruie en plaas in ’n voorverhitte oond van 80 ˚C oornag.
Malvapoeding-‘pops’
Bestanddele
Poeding
- 30 ml botter, sag
- 125 ml wit suiker
- 1 ekstra groot eier
- 15 ml appelkooskonfyt of gouestroop
- 5 ml koeksoda
- 125 ml melk
- 250 ml koekmeel
- knippie sout
- 15 ml wit asyn
Sous
- 125 g botter
- 185 ml wit suiker
- 250 ml melk
- 5 ml vanielje
Metode
- Room die suiker en die botter saam, voeg die eier by en klits tot romerig.
- Voeg nou die appelkooskonfyt by en meng goed.
- Meng die koeksoda en die melk goed, voeg by die botter mengsel.
- Sif die meel by en meng goed, voeg nou die asyn by en giet in mengbak wat gesmeer of gespuit is.
- Bak in voorverhitte oond van 170 ˚C tot ligbruin en gaar. Ek het ʼn elektriese “cakepop”-masjien gebruik om die malvapoedingbeslag in te bak, wag totdat die masjien warm is, bespuit met kleefwerende kossproei.
- Skep die een heel helfte van die “cake pop”-pan vol beslag en maak toe. Los om gaar te word. Wag totdat dat die malvapoedingballetjies mooi goudbruin en lig is.
- Giet die sous oor die warm poeding sodra dit uit die oond kom.
Sous
- Kombineer al die bestanddele en verhit in ’n pot tot alles gesmelt is.
Heerlik!
Dankie vir die lekker resepte – Maar MM ek dink julle het n tikfout begaan “Verhit die botter en die olie, en braai die aartappels in die mengsel tot bors aan die buitekant. Hou eenkant” Ek dink julle bors moet “Bros” lees dalk?!.
Dagsê Miena
Dankie vir jou kommentaar.
Die resep is intussen gewysig.
Groetnis
Janice
nms Maroela Media
Jy is welkom.
Groetnis