Sit hierdie veselryke slaai voor as middagete of op ʼn warm somersaand.
Lewer 4 porsies
Bestanddele
- 8-10 (± 450 g) jong aartappels
- 100 g gemengde slaaiblare, in kleiner stukkies geskeur
- ±230 g avokado, in skyfies gesny (160 g sonder pit en skil)
- 12 (100 g) kersietamaties, gehalveer
- 217 g-blik John West- pienk salm, gevlok, of 200 g gerookte salm in repies gesny
- ½ (50 g) middelslag-ui, geskil en in dun skyfies gesny
- 30 g pekanneute, heel of gekap
- 75-100 ml lae-olie Franse slaaisous
- gekapte vars vinkel- en/of vars pietersielie
Metode
- Skrop die ongeskilde aartappels skoon en halveer elkeen. Bedek dit met koue water en verhit tot kookpunt. Prut die aartappels vir 10 tot 15 minute tot net gaar. Dreineer en laat afkoel.
- Plaas die slaaiblare in ʼn slaaibak. Versprei die koue gaar aartappels, avokado, tamaties, salm, ui en pekanneute oor die slaaiblare. Giet net genoeg van die slaaisous oor om die slaai klam te maak. Strooi gekapte vinkel en/of pietersielie oor en verkoel voor bediening.
Variasies:
- Vervang die salm met tuna of koue gaar vis van jou keuse.
- Vervang die salm met gaar hoender of maer biltongrepies.
- Vervang dan die Franse slaaisous met lae-olie mayonnaise of meng gelyke dele heuning, ongegeurde laevet jogurt en vars suurlemoensap en drup dit oor die slaai.
Bron: Lekker & gesond: Veselryk
Uitgewer: Lapa