Allerbeste Ranger in die reeks

Die meeste mense glo die duurste model in die reeks is die beste een. Die duurste een is meestal die luuksste een met die meeste tierlantyntjies – maar gereeld nie die beste een in die reeks nie.

Dit is presies die geval met Ford se nuwe Ranger-reeks. Terwyl die Wildtrak en Raptor albei fantasties is, is albei prysgewys bo die meeste mense se vuurmaakplek. Aan die teenoorgestelde kant van die reeks sit ʼn mens gewoonlik met ʼn werkesel – staalwiele en viniel-sitplekke – ook nie geskik as ʼn gesinsmotor nie.

In die Ford Ranger-reeks is gelukkig ʼn model wat ek dink is die perfekte bakkie. Dis hul XLT-dubbelkajuit. Die spesifikasie is nie bloot voldoende nie, dis eintlik luuks. Daar is leerbekleedsel, spoedkontrole, klimaatbeheer, elektriese vensters, Apple CarPlay en Android Auto met ʼn lekker raakskerm én Ford se volle veiligheidsuite. Daar is beslis niks wat jy nodig kan kry wat nie daar is nie.

Onder die kap sit ʼn ander juweel. In die vorige reeks al was die XLT‑enkelturbo my gunsteling, maar in dié opknapping voel die nuwe programmering op die ratkas en wringkragomsitter soos ʼn splinternuwe ratkas. Die ratverhoudings is beter en die ratwisselings seepglad. Dít, saam met ʼn 2.0‑enkelturbo‑viersilinderdieselenjin wat 125 kW en 405 Nm bied, is lekker. Dié enjin bied oorgenoeg krag waarvoor die meeste mense dit ooit sal nodig hê, maar dis die puik brandstofverbruik wat die enkelturbo bied wat hom die keuse in die reeks vir my maak.

Op die pad toer die XLT beter as die meeste ander in die reeks te danke aan sy 16”‑wiele wat met ʼn lekker groot bandprofiel loop. Dit maak die rit lieflik soepel. Padhouvermoë is indrukwekkend vir ʼn bakkie – én Ford se Ranger het ʼn allemintige sleepvermoë van 3,5 ton.

Dit is dus uiters maklik om die XLT op te som. Dis ʼn minder ingewikkelde bakkie vanweë een turbo en vier ratte minder. Van die onnodige foefies is verwyder en jy sit met ʼn puik voertuig wat byna R280 000 minder kos as die reeksleier.

Die dubbelkajuit‑Ranger-reeks lyk nou só:

Die reeks word gedek deur ʼn 4 jaar/120 000 km-waarborg. Diensplanne is opsioneel beskikbaar.