(Foto: Mpumelelo Macu)
Ons was onlangs in die Oos-Kaap om opnuut die hele reeks Polo-voertuie onder hande te neem. Die Polo-naamplaatjie is gʼn vreemdeling vir Suid-Afrikaners nie; dit was in die verlede gereeld ons topverkoper in die passasiervoertuigsegment.
Dit bly vir my ʼn raaisel hoekom sedanmotors besig is om uit te sterf. Vat ʼn luikrug, kompak uit die B-segment of iets groters uit die C-segment, gee dit ʼn enorme kattebak – en siedaar …
Maar niemand koop meer die goed nie.
Almal wil ʼn (minder praktiese) sportnutsvoertuig (SNV) hê. Ek stem dat veral Gauteng se paaie tans in ʼn afgryslike toestand is, maar daarvoor het mens eerder sterker bande nodig, nie ʼn SNV nie.
(Foto: Mpumelelo Macu)
Die Polo-sedan kom uit Indië en daarmee saam ongelukkig ook ʼn ligte binneruim. Gelukkig het Volkswagen nou vir ons donker bekleedsel op die sitplekke laat sit. Onder die kap sit ʼn atmosferiese 1.6-viersilinderpetrolenjin. Bó op die platorand kan die outo aanvanklik bietjie lig in die broek voel, maar jy raak hom vinnig gewoond en dan loop alles klopdisselboom. Die enjin bied 81 kW en 152 Nm. Die handrat is ʼn 5-spoed en die outo ʼn 6-spoed.
Die Polo Vivo is trots Suid-Afrikaans en word op tuisbodem vervaardig by Volkswagen se aanleg in Kariega. Dit is Volkswagen se stokou resep van die CITI Golf. Vat die uitgaande model, kry sy onderdele plaaslik vervaardig teen ʼn beter prys en stel die motor bekend onder ʼn ander naam teen ʼn winskoop.
Só het hulle die CITI Golf vir dekades aan die gang gehou en daarna die Polo Vivo.
Die nuutste Vivo is werklik ʼn aantreklike outjie en bied goeie waarde. Die Vivo GT spog met ʼn 1.0-driesilinderturbo-enjin wat 81 kW en 200 Nm bied. Die GT maak gebruik van ʼn puik 6-spoed-handrat.
Die Polo is ʼn ware juweel. Ons VW-fabriek hier in Kariega bou Polo vir groot markte wêreldwyd. Polo GTI word slegs hier in Suid-Afrika vervaardig. Dit is ʼn groot pluimpie vir Volkswagen in SA en hul bougehalte.
-
- (Foto: Mpumelelo Macu)
-
- (Foto: Mpumelelo Macu)
Die nuutste Polo ry soos ʼn droom. ʼn 1.0-driesilinderturbopetrolenjin wat 70 kW en 175 Nm bied deur ʼn 5-spoed-handrat ry heerlik. Dié Polo is een van die min kompakte luikrugmotors wat werklik nie klein voel nie. Die Polo troos jou agter die stuur en voel soos ʼn ware luukse motor.
My opsomming is soos volg: ongeag jou behoeftes, Volkswagen het ʼn Polo wat sal pas. Die sedan en Vivo is bekostigbaar en een kom met ʼn enorme kattebak. Die volvet-Polo is luuks en die GTI is ʼn vuurvreter van formaat.
-
- (Foto: Mpumelelo Macu)
-
- (Foto: Mpumelelo Macu)
Indien jy in die mark is vir ʼn B-luikrug of sedan, gaan loer beslis na die Polo; dit is nie verniet gereeld Suid-Afrika se gewildste passasiermotor nie.
Die Polo-reekse lyk só:
Vivo:
| Volkswagen Polo Vivo 1.4 Trendline | 55 kW/130 Nm | 5.7 l/100 km | R248 500 |
| Volkswagen Polo Vivo 1.4 Comfortline | 63 kW/132 Nm | 5.9 l/100 km | R269 600 |
| Volkswagen Polo Vivo 1.6 Comfortline outo | 77 kW/153 Nm | 6.1 l/100 km | R299 600 |
| Volkswagen Polo Vivo 1.6 Highline | 77 kW/153 Nm | 6.2 l/100 km | R299 600 |
| Volkswagen Polo Vivo 1.0TSI GT | 81 kW/200 Nm | 4.6 l/100 km | R336 100 |
Die reeks word gedek deur ʼn 3 jaar/120 000 km-waarborg. Die diensplan is opsioneel.
Sedan:
| Volkswagen Polo sedan 1.6 | 81 kW/152 Nm | 6.2 l/100 km | R340 700 |
| Volkswagen Polo sedan 1.6 Life | 81 kW/152 Nm | 6.2 l/100 km | R369 900 |
| Volkswagen Polo sedan 1.6 Life outo | 81 kW/152 Nm | 6.5 l/100 km | R391 200 |
Die reeks word gedek deur ʼn 3 jaar/120 000 km-waarborg en 3 jaar/45 000 km-diensplan.
Polo:
| Volkswagen Polo 1.0 TSI 70kW | 70 kW/175 Nm | 5.3 l/100 km | R337 700 |
| Volkswagen Polo 1.0 TSI 70kW Life | 70 kW/175 Nm | 5.3 l/100 km | R379 200 |
| Volkswagen Polo 1.0 TSI 85kW Life outo | 85 kW/200 Nm | 5.4 l/100 km | R401 500 |
| Volkswagen Polo 1.0 TSI 85kW R-Line outo | 85 kW/200 Nm | 5.4 l/100 km | R450 000 |
| Volkswagen Polo GTI | 147 kW/320 Nm | 6.4 l/100 km | R527 700 |
Die reeks word gedek deur ʼn 3 jaar/120 000 km-waarborg en 3 jaar/450 000 km-diensplan.
Brendon, die antwoord op jou vraag oor hoekom sedan motors uitsterf, is die antwoord baie maklik in 3 redes:
1. Vir die prys van ‘n POLO kan ek ‘n (bitter) goeie chinese SUV (o.a. Cherry) koop.
2. Almal koop deesdae SUV’s, so in verkeer voel jy in ‘n sedan bietjie gedomineer.
3. Motor maatskappye moet ook maar deel van die blaam dra. Daar is seker 5 advertensies in die media vir ‘n SUV teen sowat 1 vir ‘n sedan. Hulle adverteer SUV as ‘n leef of lewens styl en dit verkoop.
Polo! dit is net n 40/80 motor hier in die Kaap. Kan net 40km/h in die dorp ry en net 80km/h op die snelweg. Sien dit elke dag! Hehehehe
Ek ry ‘n 2019 Hyundai Elantra en sal daardie kar se spasie, krag, gerief en petrolverbruik vir geen SUV verruil nie. Ek belê eerder in beter bande en beplan my roetes beter. Al my vrinne met hulle SUV karre het maar net nie die kattebak spasie wat ek het nie en dan slaan hulle altyd hulle sitplekke plat om ‘n punt te bewys dan vra ek maar net hoekom het hulle ‘n 7-seater gekoop maar moet die heeltyd sitplekke platslaan vir spasie?