Kia se nuutste Sportage is beslis iets vir die oog. ʼn Uiters moderne ontwerp wat ‘n perfekte balans tref om nie té vroulik of té manlik voor te kom nie. Ek hou werklik daarvan. By sy bekendstelling verlede jaar het ons egter dieselkragbronne gemis.
Uiteindelik is die wag verby en het Kia pas sy reeks bygewerk met ʼn dieselmodel. Drie eintlik. Een enjin en drie verskillende spesifikasievlakke. Kia het dit goedgedink om die 1.6 ℓ-CRDi-viersilinderturbodieselenjin te kies. Ek is geneig om met hulle saam te stem. Die enjin bied ʼn romerige 100 kW en 320 Nm. Die enjin gaan gepaard met ʼn 7-spoed-dubbelkoppelaar-outokas en die twee saam sorg vir fantastiese brandstofverbruik … Kia beweer 4,9 ℓ/100 km.
Die ontwerp is kraakvars, en só ook die ontwerp van die binneruim. Gemaklik én ergonomies uitgelê met ʼn magdom luukshede om mens gemaklik te hou. Wat eerste opval, is die groot geboë raakskerm vir die inligtingstelsel wat Apple CarPlay en Android Auto bied. Die instrumente lees maklik en mens kan relevante inligting vertoon wanneer nodig.
Die kajuit is gemaklik en bied sitplek vir vyf en ʼn reusekattebak van 571 ℓ. Kia sê die Sportage mag 1 650 kg sleep – nie te versmaai nie … my woonwa weeg 1 350 kg gelaai. Lekker. Ek het net een kwaal. Daar is dinamiese knoppies waarvan die funksie verander na gelang van watse funksie jy mee besig is. Indien mens in die lugreëling is, stel die een die temperatuur en die ander die waaier se spoed. In die radio stel die een die golflengte en die ander die volume. Indien mens Apple CarPlay gebruik, bly daai stelling op die lugreëling en dan is die enigste volumekontrole op die stuurwiel … ʼn klein frustrasie wat Kia waarskynlik vinnig sal uitstryk.
Op die pad bied die dieselweergawe van die Sportage dieselfde lekker rit met goeie ritgehalte en sterk padhouvermoë. Die Sportage spog met ʼn groot veiligheidspesifikasie van ses lugsakke, sluitweerremme met elektroniese remkragverspreiding, asook vastrap en stabiliteitsbeheer. Kia se markleidende waarborg bied ʼn 5 jaar/onbeperkte km-waarborg en 5 jaar/90 000 km-diensplan.
Ná ʼn kort rukkie agter die stuur geniet mens die wringkrag wat ʼn turbodiesel bied. Ongelukkig gaan diere van dié soort nie meer lank vryloop nie, want die Europeërs maak mos oorlog met diesel oor sy besoedeling. Ek persoonlik is gek oor die verbruik wat hulle bied, en in ʼn segment waar daar bitter min dieselmodelle nog beskikbaar is, sou ek vinnig ʼn diesel-Sportage opraap, terwyl mens kan.
Die reeks lyk nou só:
Kia Sportage 1.6T-GDi LX | 132 kW/265 Nm | 6,5 ℓ/100 km | R567 995 |
Kia Sportage 1.6CRDi LX | 100 kW/320 Nm | 4,9 ℓ/100 km | R597 995 |
Kia Sportage 1.6T-GDi EX | 132 kW/265 Nm | 6,5 ℓ/100 km | R621 995 |
Kia Sportage 1.6CRDi EX | 100 kW/320 Nm | 4,9 ℓ/100 km | R651 995 |
Kia Sportage 1.6T-GDi GT-Line | 132 kW/265 Nm | 6,5 ℓ/100 km | R677 996 |
Kia Sportage 1.6T-GDi GT-Line Plus | 132 kW/265 Nm | 6,5 ℓ/100 km | R705 995 |
Kia Sportage 1.6CRDi GT Line Plus | 100 kW/320 Nm | 4,9 ℓ/100 km | R735 995 |
Kia Sportage 1.6T-GDi GT-Line S | 132 kW/265 Nm | 6,5 ℓ/100 km | R762 995 |
Ons sal weer tyd saam met die Sportage deurbring en hom dán teen sy mededingers vergelyk.