Die polisie was Maandag in Klerksdorp steeds op soek na Elizabeth Louw (96) en haar tuinier, Gert Marks (55) se moordenaars.
“Die ondersoek duur voort, maar niemand is nog in hegtenis geneem nie,” het kaptein Amanda Funani, woordvoerder van die polisie in Noordwes, gesê. “Ons sal alles in ons vermoë doen om hulle op te spoor en volg alle beskikbaar leidrade.”
Louw en Marks se liggame is Saterdagmiddag in haar huis in Wilkopies opgespoor. “Beide slagoffers is glo versmoor en verwurg. Die bejaarde vrou se voete en arms was met skoenveters vasgebind voordat hulle haar vermoor het,” het Funani bygevoeg. “Die moordenaars het haar juwele en ‘n onbekende bedrag geld gesteel.”
Funani sê Louw se suster het onraad vermoed toe sy nie haar telefoonoproepe beantwoord het nie.