Asblik-lyk: Man gevang

Die polisie het ʼn 23-jarige verdagte in hegtenis geneem vir die moord op ʼn 21-jarige vrou, wie se liggaam na haar moord in ʼn asblik geplaas is.

Maroela Media het Saterdag berig die liggaam van Elizabeth Phokompe is in ʼn asblik in ʼn buitekamer van haar huis in Jouberton, Noordwes, gekry. Haar ma en bure het bekommerd geraak nadat sy sedert Donderdag nie haar foon geantwoord het nie. Hulle het Vrydag gaan ondersoek instel en op haar liggaam afgekom nadat hulle ʼn vreemde reuk uit die asblik geruik het.

Amanda Funani, ʼn polisiewoordvoerder, sê die verdagte is Sondag omstreeks 10:00 in hegtenis geneem. Die verdagte is glo Phokompe se vriend.

“Daar word beweer dat die verdagte jaloers geword het nadat hy Phokompe saam met ʼn ander man gesien het. Die verdagte se oom het hom aan die polisie oorgegee,” het Funani gesê.

Die polisie ondersoek ʼn saak van moord. Die verdagte moet Dinsdag in die Klerksdorp-landdroshof verskyn.