Man val na sy dood by Leeukop; getuies neem glo net foto’s

Lion’s Head by Tafelberg in Kaapstad

‘n Man wat Leeukop in Kaapstad gaan klim het, het na sy dood geval.

“Die liggaam van ‘n 47-jarige man is Sondagoggend omstreeks 08:45 opgespoor nadat hy gegly en geval het. Die man het saam met sy gesin gaan stap,” het lt.kol. André Traut, woordvoerder van die polisie in die Wes-Kaap, gesê. Paramedici het die man op die toneel dood verklaar.

CityPress berig ‘n 25-jarige man met die naam Zac, wat nie sy van wou noem nie, het glo na die man gehaas om hom te help. “Ek was byna ‘n uur lank by hom om vir die paramedici te wag. Niemand het ons kom help nie. Hulle het net foto’s geneem,” het Zac glo gesê. Zac, wat ‘n noodhulpkwalifikasie het, het tevergeefs probeer om ‘n pols by die man te kry. “Een groep verbygangers het ‘n noodhulpsakkie na ons gegooi, maar ek kon nie sien wie dit is nie, hulle is dadelik weer weg.”

Volgens CityPress is die slagoffer se naam Ibrahim Salie en was hy saam met sy dogter en ‘n vriend op die berg.

‘n Geregtelike doodsondersoek sal gedoen word.