Nóg ‘n SAR-soldaat sterf

SANW-soldate dra die kiste van hul gevalle kollegas by Waterkloof-lugmagbasis op 28 Maart 2013 Foto: Werner Beukes/SAPA

‘n Soldaat wat in die Sentraal-Afrikaanse Republiek (SAR) beseer is, het in die Pelonomi-hospitaal in Bloemfontein gesterf.

“Een van die lede wat in die SAR beseer is, het Maandag in ‘n hospitaal in Bloemfontein gesterf,” het brig.gen. Xolani Mabanga, woordvoerder van die Suid-Afrikaanse Nasionale Weermag (SANW), gesê. “Hy is op 19 April uit die 1 Militêre Hospitaal in Pretoria ontslaan en is terug huis toe, in Bloemfontein. Hy het Maandag ineengestort en is na die hospitaal gehaas. Hy is na 3 Militêre Hospitaal in Bloemfontein gehaas voordat hy na die Pelonomi-hospitaal oorgeplaas is. Hy het in die hospitaal gesterf.”

Die oorsaak van sy dood is nie bekend nie en sal eers beskikbaar wees sodra die nadoodse ondersoek afgehandel is.

Dertien SANW-soldate is op 23 Maart dood in ‘n skermutseling met rebelle naby die SAR se Bengui-grens. ‘n Verdere 27 soldate is gewond. Die SANW het soldate na die land gestuur op grond van ‘n ooreenkoms wat tussen Suid-Afrika en die ontsetelde president Francois Bozize gesluit is.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae