ʼn 13-jarige seun is in ʼn bedenklike toestand ná hy Donderdagoggend in Fernhamrylaan in Phoenix in KwaZulu-Natal geskiet is.
“ʼn Lid van Reaction Unit South Africa (Rusa) was omstreeks 09:30 op patrollie in die gebied toe hy gesien het die tiener het ʼn ernstige besering aan sy regter-bobeen opgedoen,” het Rusa in ʼn verklaring gesê. “Rusa se paramedici is onmiddellik ontbied en hulle het kort daarna by die toneel opgedaag.”
ʼn 12-jarige maat van die seun het aan die beamptes gesê hulle is albei graad 8-leerders by ʼn skool in Ntuzuma. “Hy het gesê sy vriend het ʼn selfoon by ʼn ander skolier gesteel en hy het van die toneel gevlug toe vier mans in ʼn wit Volkswagen Polo verskeie skote op hom gevuur het. Een van die skote het hom in die been getref en hy het geval.”
Die insittendes in die Polo het die selfoon teruggevat en hom op die sypaadjie vir dood agtergelaat. “Die 12-jarige het sy vriend gehelp om na ʼn mediese fasiliteit te loop toe die Rusa-beampte hulle opgemerk het.”
Die seun is op die toneel gestabiliseer voor hy in ʼn kritieke toestand na ʼn hospitaal geneem is.
Rusa-beamptes het ʼn soektog van stapel gestuur na die wit Volkswagen Polo, maar die soektog het nog nie enigiets opgelewer nie.
Phoenix bly in die nuus deesdae vir alle verkeerde redes
Wonder waar was die polisie…..
Moes maar liewer die foon gelos het.
Misdaad kom teen ‘n prys, gewoonlik vir die slagoffer, in hierdie geval was dit die oortreder.
Misdaad is nie volhoudbaar, daar is geen wenners.
Hoe skiet jy n kind , maak nie saak wat hy gedoen het nie. Ek hoop hulle word gou aangekeer
Maar jy mag mos nie meer die kinders tug (slaan nie), nou wat moet mens dan nou doen?
Hy het duidelik n finale waarskuwing gekry
Skiet is dan nou SA se nasionale sport! Die regering moet nou nog net trofees begin gee vd skieters. Dis tog per slot van sake deur hulle toedoen dat die wilde weste nou realiteit geword het in ons eens pragtige land.
Mense vat reg in eie hande want die polisie doen niks