Agt plaasaanvalle dié week; AfriForum gee veiligheidswenke

Argieffoto: Reint Dykema

Argieffoto: Reint Dykema

Die burgerregte-organisasie AfriForum het sy kommer uitgespreek oor die vlaag plaasaanvalle en -moorde wat die afgelope week oor die hele land voorgekom het en veiligheidswenke gegee vir gemeenskappe om meer te doen om hulle te beveilig.

Sedert Donderdag verlede week is gemeenskappe in Noordwes, die Noord-Kaap, die Vrystaat, KwaZulu-Natal en Mpumalanga geruk deur gewelddadige aanvalle waaroor in die media berig is en wat die lewe van minstens drie mense geëis het.

Christo Kruger (63) van Kuruman is op sy plaas Byron deur aanvallers doodgeskiet (lees meer). Danie Robbertse (43), oudpolisieman van Buffelspoort in Noordwes, sterk in die hospitaal aan nadat hy drie keer in sy skouer, linker- en regterbeen geskiet is (lees meer). In Ladybrand is Bill Clark (45) van die plaas Zuurbult oorval en met ’n mes gesteek (lees meer). Andries Snyman (59) is in sy huis op ’n hoewe in Rashoop naby Brits drie keer met ’n mes gesteek voordat hy ’n paar uur later aan sy wonde beswyk het (lees meer). Peter Johnson (56) van ’n suikerrietplaas in die Nyoni-omgewing by Eshowe in KwaZulu-Natal is vermoor (lees meer). Erick Meiring (64), ’n plaasbestuurder in die Komatipoort-omgewing is deur vyf gewapende rowers oorval, vasgebind en aangehou (lees meer). ’n 57-jarige vrou van Bokfontein buite Brits is deur gewapende rowers oorval (lees meer). Rodger van Parys (71) van ’n plaas tussen Mooinooi en Rustenburg is in ’n kritieke toestand nadat sy aanvallers ’n swaard in sy keel afgedruk het (lees meer).

Ian Cameron, AfriForum se hoof van gemeenskapsveiligheid, het beklemtoon dat gemeenskappe meer paraat moet wees en hulle moet verdedig indien moontlik. “Gemeenskappe moet ook inisiatief neem en eie buurtwagte en veiligheidsnetwerke gereed kry of by bestaandes aansluit.”

Veiligheidswenke

  1. Wees paraat. Deur net bewus te wees van wat rondom jou aangaan, kan gevare dikwels afgeweer of selfs vermy word. Let op veranderings rondom die huis en die werf, daar word dikwels ná aanvalle skuilplekke van aanvallers gevind waar hulle die boer en gesin vir dae voor die aanval dopgehou het.
  1. Verander gereeld jou roetine. So kan geen misdadiger wat jou dophou presies bepaal waar of wanneer jy wat gaan doen nie. Dit belemmer ook sy beplanning vir ʼn moontlike aanval. Aanvallers word onderskat omdat dit partykeer gesien word as ʼn opportunistiese misdaad. Dit is wel dikwels nie die geval nie. Plaasaanvalle word meestal deeglik beplan.
  1. Ken jou werkers. Dit is belangrik dat boere weet presies wie toegang het tot die plaas. Dit word ook aanbeveel dat daar ʼn databasis is met elke arbeider se ID-bewys en ʼn foto. Met die korrekte ID-dokumente kan bepaal word of die arbeider ʼn misdadiger is en of daar enige hangende sake teen die persoon is. Dit kan dan ook bepaal word of die werker ʼn Suid-Afrikaner is en of hy of sy wettig in die land is. In party gevalle kan daar selfs vingerafdrukke geneem word voordat enige persoon in diens geneem word. Dit beteken indien ʼn misdaad op die plaas gepleeg sou word, is daar reeds vingerafdrukke beskikbaar om dié van misdadigers mee te vergelyk.
  1. Dubbele heinings word aanbeveel omdat dit dan nog moeiliker is vir iemand om die eiendom te betree. In sekere gebiede word geëlektrifiseerde heinings gebruik as eerste linie wat volg met nog ʼn palissade of lemmetjiesdraadheining as tweede linie.
  1. Selfverdedigingsklasse is waardevol om verdedigingsbeginsels te leer, veral vir ʼn hele gesin. In landelike gevalle is dit partykeer moeilik om by gereelde klasse uit te kom en dus is konsepkursusse belangrik. Besoek gerus http://www.fortisgroup.co.za/ wat soortgelyke kursusse kan aanbied.
  1. Raak betrokke by ʼn plaaswagstelsel, en indien daar nog nie een is nie, begin een.

Vroeë waarskuwingstelsels

Ongelukkig is dit so dat konfrontasie met ʼn misdadiger nie altyd vermy kan word nie. Dus stel ons voor dat daar vroeë waarskuwingstelsels gereed is. Op hierdie manier kan ʼn boer en die gesin tyd hê om weg te kom uit die gevaar van ʼn moontlike aanval. Die boer word dan betyds in kennis gestel van enige moontlike gevaar.

  1. Gooi gruis tussen twee linies en rondom die huis sodat daar gehoor kan word as iemand daar loop en die eiendom betree.
  1. Gebruik alarmstrale (“beams”) wat huisbewoners in kennis kan stel as iemand buite beweeg. Hierdie strale kan per SMS werk om jou in kennis te stel presies waar ʼn betreder kan wees sonder dat jy eens hoef op te staan.
  1. Honde is een van die beste alarmstelsels waarin enige persoon op ʼn plaas of in die stad kan belê. Dit is ongelukkig so dat honde partykeer vergiftig word, maar met honde en alarmstrale is dit moeiliker vir die misdadiger om toegang tot die huis te kry. Kleiner hondjies binne ʼn huis word ook aangemoedig omdat hulle baie vinnig onraad aan die buitekant merk en geluide hoor.
  1. Kringtelevisiekameras is ʼn goeie idee rondom enige werf. Hoewel dit duur kan wees, kan dit diefstal en ander gevare monitor.
  1. Ligte is noodsaaklik en elke donker hoekie om ’n plaashuis moet verlig wees.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

18 Kommentare

jongste oudste gewildste
anon

nou wil ek weet as jy vrou aleen by jou huis is hoe maak jy……. skiet jy hom of wat!!!!!!!

anon

dis so hul voel n veer wie se jou honde gaan jou lewe kan red gewoonlik blaf hul vir katte en beeste in di aande my huis lyk soos n 5 ster hotel met al die ligte wat brand as hy wil in kom wat gaan hom keer verkrag di vrouens skiet hul dood skiet dan die man en kinders dood

anon

nee ek een jackrussel in my huis en pitbulls in die erf ek werk my self in my huis soek nie gemors in my huis om my huis leeg te steel nie

J.Z

Waar is daardie wittes wat in die ANC is ,keur hulle ook die plaas aanvalle goed,moet wees want daar is n dawerende stilte van hul kant af.Hoeveel sous geld kry hulle om so stil te wees.

werner

Ek het pitbull inhuis en malinois buite. Elektriese skok drade in tuin. Nie op heuning nie. Ligte is sonkrag en elektries wat van huis af weg lig. Los kameras wat kan verskuif word dus weet hulle nie waar kamera is nie. Is paraat alarm se paniek werk so 70m van huis nog. Kameras stuur foto as beweging op getel word. Ja sien baie katte maar hoop dit help een dag. Pitbull het al een inbreker sleg gebyt en een verwilder.