Die polisie in Noordwes sê hy doen ʼn deeglike ondersoek nadat ʼn dosent aan die Noordwes-Universiteit oor die naweek in ʼn sloot geval en gesterf het.
ʼn Sekuriteitsbeampte het Saterdag omstreeks 06:00 op Rudi van de Venter (48) se liggaam afgekom. Hy het vermoedelik deur die loop van Vrydagnag of die vroeë oggendure van Saterdag in die sloot geval.
Van de Venter was verbonde aan die departement van onderwys en het in Wiskunde doseer.
Louis Jacobs, woordvoerder van die universiteit, het vroeër gesê daar word aan die universiteit se waterpypleidings gewerk en daarom is die sloot op die kampus gegrawe. Dit is onduidelik hoe Van de Venter in die sloot beland het, aangesien dit met net toegespan is.
Volgens Maroela Media se inligting is Van de Venter vroeër die aand in Oukraal, ʼn restaurant op die dorp, gesien. Hy het na verneem word sy skootrekenaar by hom gehad.
Konst. Aafje Botma, polisiewoordvoerder, het gesê in dié stadium lyk dit nie of Van de Venter se skootrekenaar gevind is waar sy liggaam ontdek is nie. Sy het gesê dit vorm deel van die geregtelike doodsondersoek wat die polisie na die voorval doen.
“Die polisie sal alle moontlike leidrade ondersoek,” het Botma gesê.
Begrafnisreëling vir Van de Venter is nog nie gefinaliseer nie.
Ek ruik ‘n rot! Sterkte aan sy naasbestaandes
EK RUIK ‘N ROT
Ek stem, iets is nie pluis nie. Sterkte aan sy naas bestaandes.
My simpatie aan sy geliefdes. Sterkte.
Uiters hartseer. Ek hoop dat dit deeglik ondersoek sal word. Indien daar vuilspel verbonde is, moet daardie persoon die ergste straf moontlik kry. Rudi was die heel beste dosent waarvoor enige student kon vra. Hy het soveel gehad om die wêreld te bied. Uitstekende vakkennis en ‘n kritiese denker met ‘n goeie hart. Rus in vrede.