Baaise matrikulante nié wreed teenoor diere – ondersoek

Die twee kalkoene wat tydens die vieringe by die skool gaan haal is. (Foto: Facebook)

Matrikulante aan twee spogskole in Gqeberha (Port Elizabeth) het hulle nié aan dieremishandeling skuldig gemaak toe hulle onlangs sonder toestemming aan sogenaamde “40 days”-vieringe op hul onderskeie skoolterreine deelgeneem het nie.

Die leerders het wel ʼn gebrek aan empatie teenoor diere getoon.

Dít is die bevindings van Grey High School se ondersoek na die voorval wat hom op die aand van 9 Augustus op die terreine van dié skool én Collegiate Girls’ High School afgespeel het.

“Ons ondersoeke het geen bewyse van opsetlike wreedheid teenoor diere opgelewer nie, maar grootliks ʼn gebrek aan empatie teenoor diere en ʼn onvolwasse houding by ʼn klein groepie leerders wat ʼn gebrek aan begrip vir die moontlike gevolge vir hul optrede getoon het,” sê Christian Erasmus, rektor van Grey High School, in sy jongste omsendbrief aan ouers.

“Terwyl die matrikulante se gedrag onaanvaarbaar is en daartoe gelei het dat diere getraumatiseer word – waarvoor hulle gestraf sal word – steek daar geen waarheid in die sadisme en wreedheid wat in sommige koerante en sosiale media beskryf word nie.”

Daar is aanvanklik beweer dat hoenders en kalkoene tydens die reeks vieringe onder meer vasgebind en in swembaddens gegooi is. Daar was ook bewerings dat ʼn paar koi-visse nie die vieringe oorleef het nie.

“Ons kan bevestig dat geen hoenders gepluk, geskop of verdrink is nie. Geen vis is boonop doodgemaak nie en daar was geen poging om die koi-visse in die dam te vergiftig nie,” sê Erasmus in sy brief wat Maroela Media Woensdag onder oë gehad het.

Daar is bevind dat een hoender wel op Collegiate Girls’ High School se skoolterrein vrygelaat is. Volgens Erasmus is die dier in ʼn verwaarloosde toestand aangekoop. Die hoender se pote was dus reeds vasgebind en sy vlerke toegedraai toe hy aangekooop is, aldus die ondersoek.

Dié hoender word tans op ʼn kleinhoewe versorg.

Vier hoenders is ook die betrokke aand op Grey High School se kampus vrygelaat. Twee van die hoenders is in klaskamers vrygelaat en die ander twee in die binnehof. Daar is bevind dat een van die diere gedurende die vieringe oornag in die dam geval het.

Die dier is die volgende dag nat en deurmekaar gevind.

Twee kalkoene is ook op Collegiate Girls’ High School se astrobaan vrygelaat. Die diere is ongedeerd en tans in die besit van Arnold Slabbert, ʼn kenner en konsultant vir die beheer van probleemdiere by die Urban Raptor Project. Hy het die diere ná die vieringe by die skool gaan haal.

Die ondersoek het wel onthul dat ʼn aantal duiwe ongelukkig van kant gemaak moes word nadat hulle in die skoolsaal vrygelaat is. Die diere kon nie deur die oop saalvensters en deure ontsnap nie. Hulle het gespartel om vry te kom en hulself in die proses beseer.

“Die hartseer werklikheid is dat die trauma wat gely is deur die diere wat op kampus vrygelaat is, en die situasie waarin ons ons nou bevind, vermy kon gewees het en nie weer mag gebeur nie,” sê Erasmus nou.

Die Baaise rektor het ook sy versekering gegee dat die betrokke seuns nie net waarskuwings ontvang het nie, maar ook werksessies en gemeenskapsdiens sal moet voltooi.

Grey High School se matriekklas is ook aangesê om die toiletpapier, seep, meel en rou eiers wat die betrokke aand oor die kampus gegooi is, self skoon te maak. Selfs leerders wat nié aan die vieringe deelgeneem het nie, asook seuns in laer grade, het hand bygesit.

Erasmus sê die skool is deurgaans in verbinding met die Animal Anti-Cruelty League (AACLPE) wat ook hul eie ondersoek na die voorval gelas het.