Kalkoene, hoenders glo tydens ‘40 days’ mishandel

Die twee kalkoene wat tydens die vieringe by die skool gaan haal is. (Foto: Facebook)

’n Herrie het om ’n groep matriekleerders aan twee spogskole in Gqeberha (Port Elizabeth) losgebars nadat hulle vandeesweek hoenders en kalkoene tydens hul sogenaamde “40 days”-vieringe op die skoolterreine vrygelaat het. “40 days” word tradisioneel gevier wanneer matrikulante net 40 dae van skool oorhet voor die matriekeksamen begin.

Daar word beweer dat dié diere tydens die leerders aan Grey High School en Collegiate Girls’ High School se reeks vieringe onder meer vasgebind en in swembaddens gegooi is.

Christian Erasmus, rektor van Grey High School, sê dit is nog nie duidelik wat presies Woensdag op dié skool se skoolterrein afgespeel het nie en ’n ondersoek is van stapel gestuur.

“Hoewel sekere bewerings moontlik bespiegelend en duidelik verkeerd kan wees, skilder hulle ’n skokkende prentjie en het dit baie verleentheid veroorsaak, gegewe dít waarvoor ons staan ​​en wat ons, oor 12 jaar, by ons seuns probeer vestig het,” sê Erasmus.

Luidens ’n interne brief aan ouers het ’n groep seuns en meisies toegang tot Grey High School se terrein verkry en die kampus gevandaliseer. Toiletpapier, seep, meel en rou eiers is oor die kampus gegooi terwyl lessenaars in klaskamers onderstebo gegooi is.

“Wat die meeste kommer wek, is dat ’n baie klein minderheid besluit het om vee op dié kampus én Collegiate se kampus vry te laat,” sê Erasmus en Garth Morris, beheerliggaamvoorsitter, in die brief wat Donderdag aan ouers gestuur is.

Luidens die brief het die groep ’n laakbare en “siek verontagsaming” van die diere vertoon. “Die afgryslike gedrag wat aangemeld is, het geen plek by ons skool of enige ander plek nie.”

Arnold Slabbert, ’n spesialis en konsultant vir die beheer van probleemdiere by die Urban Raptor Project, sê ’n opsigter het hom Woensdag na Collegiate Girls’ High School ontbied om twee kalkoene te gaan oplaai.

“Die storie agter die kalkoene was so bisar, selfs ek was geskok,” sê Slabbert in ’n inskrywing op sosiale media.

Volgens Slabbert is die kalkoene se pote aan mekaar vasgebind voordat hulle in ’n leë swembad gegooi is. Hoenders se pote is glo die vorige week by Grey High School aan mekaar vasgebind voordat hulle ook in ’n swembad gegooi is.

’n Hoender se vere is ook na bewering uitgepluk voordat dié dier in ’n plastieksak vasgebind is.

Die departement van onderwys het intussen van die bewerings kennis geneem.

Mali Mtima, woordvoerder van die Oos-Kaapse departement van onderwys, het vanoggend aan Maroela Media gesê die departement het ook sy eie ondersoek na die bewerings gelas.

“Ons is geskok en ontsteld oor hierdie bewerings en wil graag sien dat hierdie skole so gou moontlik op die bewerings reageer.

“Die departement is gekant teen enige dieremishandeling, daarom probeer ons ons kinders leer dat ons as mense saam met diere bestaan ​​en as sodanig moet ons hulle beskerm en koester.

“Ons doen ’n beroep op ouers en die gemeenskap om kinders te help leer dat diere beskerming en versorging nodig het; daarom is enige dieremishandeling teen die wet en iemand kan daarvoor vervolg word.”

Moontlike vervolging?

Die Animal Anti-Cruelty League (AACLPE) het reeds talle oproepe van gemeenskapslede ontvang wat daarop aandring dat die betrokke leerders strafregtelik vervolg word. Die organisasie wys egter daarop dat bewyse benodig word om die saak verder te voer. “Getuienis van hoorsê is nie voldoende nie.”

Die AACLPE doen ’n beroep op enige ooggetuies om na vore te kom en verklarings af te lê.

Erasmus het in die brief aan ouers benadruk dat Grey High School se ondersoek nog nie afgehandel is nie.

“Die werklikheid is dat ons nog nie ons ondersoek na hierdie gebeure voltooi het nie en ook nie die hoofsondaars geïdentifiseer het nie. Ons is vol vertroue dat ons sal kan vasstel wat gebeur het en wie verantwoordelik is.”

Collegiate Girls’ High School wou Vrydagoggend geen kommentaar rakende die bewerings lewer nie. Daar is wel aan Maroela Media bevestig dat die skool die bewerings ondersoek.