BEE-reëls kan Musk se Starlink in SA kelder

Starlink gebruik ʼn netwerk van duisende satelliete om internetdienste met behulp van satellietskottels aan gebruikers te verskaf. (Foto ter illustrasie: Unsplash)

Die Onafhanklike Kommunikasie-owerheid (Okosa) kan die maatskappy SpaceX se Starlink-internetdiens se planne om alternatiewe internettoegang aan Suid-Afrikaners te verskaf, stuit selfs nog voor dit aan die gang kom.

SpaceX Starlink behoort aan die Suid-Afrikaans gebore miljardêr Elon Musk, en is ʼn satellietnetwerk wat internettoegang sal verskaf aan veral gebruikers in afgeleë gebiede waar daar dikwels nie veselkabelnetwerke bestaan nie.

Op die Starlink-webwerf kan Suid-Afrikaanse gebruikers reeds ʼn deposito van $99 (sowat R1 400) betaal om voorkeurtoegang tot die netwerk te verseker. Netwerktoegang sal volgens Starlink volgende jaar hier beskikbaar wees.

Starlink gebruik ʼn netwerk van duisende satelliete om internetdienste met behulp van satellietskottels aan gebruikers te verskaf. Daar is groot opwinding oor die projek weens die moontlikheid om onbeperkte, hoëspoed internet na afgeleë gebiede wêreldwyd te bring.

Maar eers moet die maatskappy aan Suid-Afrika se swart bemagtigingsvereistes voldoen.

Okosa het onlangs regulasies in werking gestel wat internetdiensverskaffers (ISP’s) dwing om 30% swart eienaarskap en ʼn vlak 4 BBBEE-status te hê indien hulle ʼn lisensie wil bekom.

Dit is regulasies wat die DA as “katastrofies” vir die ISP- en telekommunikasiebedryf in Suid-Afrika bestempel.

“Die regulasies gaan ISP’s wat nie daaraan voldoen nie, straf met boetes van R5 miljoen of 10% van hul jaarlikse omset. In ʼn poging om dit te omseil, kan ISP dalk frontmaatskappye begin gebruik in ʼn poging om aan die irrasionele en diskriminerende regulasies te voldoen,” sê Zak Mbhele, die DA se woordvoerder oor kommunikasie en digitale tegnologie.

“Uiteindelik gaan Suid-Afrikaners die spit afbyt van vertraagde innovasie en verhoogde pryse.”

Mbhele sê Okosa is reeds besig om buitelandse belegging in Suid-Afrika in die gedrang te bring.

Indien die regulasies ook op SpaceX afgedwing word, kan die projek hier in die hek duik voor dit nog behoorlik op dreef is.

“Die poging van Okosa bou oënskynlik voort op die regering se wysigingswetsontwerp oor diensbillikheid wat die minister van arbeid en indiensneming probeer bemagtig om nasionale ekonomiese sektore te identifiseer en kwotas vir dié sektore te stel,” sê Mbhele.

Hy sê die DA is ten sterkste gekant teen dié en ander wetgewing wat voorsiening maak vir rasgebaseerde klassifikasie.

“Ware ekonomiese bemagtiging gaan slegs gebeur deur innovasie en werkskepping, iets waarvoor BBBEE op papier voorsiening maak, maar in werklikheid vernietig vir almal behalwe enkeles met politieke bande.”

My Broadband berig Okosa is gevra of SpaceX aan die nuwe regulasies moet voldoen omdat dit ʼn Amerikaanse maatskappy is wat ingevolge daardie land se wetgewing nié sulke maatreëls hoef te voldoen nie. Die owerheid hou voet by stuk dat geen aansoek oorweeg sal word as dit nie aan die nuwe bepalings oor swart eienaarskap voldoen nie.

SpaceX het glo nog nie daarvoor aansoek gedoen nie. Indien hy egter nie 30% in swart besit is nie, gaan hy nie die nodige regulatoriese toestemming kry om Starlink-dienste in Suid-Afrika aan te bied nie.

SpaceX is in private besit en min is bekend oor presiese aandeelhouding.

Musk besit wel die meerderheidsaandeel.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

31 Kommentare

jongste oudste gewildste
Alet

Soos my ma sou sê – daar is nie pille vir stupidgeit nie.

Dries

Kom jouself te na omdat jy breinloos is.

Dawie

Die hele BBEE storie is sommer net gemors. As ek Musk was sou ek nie voldoen aan die land se reels nie. As n internasionale maatskappy hoef hy nie ten volle met BBEE te vol doen nie. Hy hoef nie eers n kantoor oop te maak nie. Support en RMA kan alles deur email en courier gedoen word. Ek verstaan met ICASA en alles gaan die routers en alles goed gekeur soos enige andere Wireless product, dis die minste van sy probleem. Die BBEE gaan net n voet in die deur sit met die uitbreiding van tegnologie en konneksie vir… Lees meer »

Anel

Bly maar eerder weg. Moennie jou siel en jou maatskappy aan die duiwel verkoop nie. Jy gaan in elke geval ‘n verlies lei as jy doen wat hulle sê. Die res van die wêreld het nie sulke snert nie. Doen daar besigheid. Die kool is nie die sous werd hier nie.

Jean

Asof hy omgee as hy nie S.A. se besigheid kan kry nie.