Bejaarde sterf ná wrede hameraanval

Argieffoto: enca.com

ʼn Bejaarde vrou van Port Elizabeth is Woensdag, net meer as vier weke nadat sy wreed in haar huis met ʼn hamer aangeval is, dood.

AO Alwin Labans, polisiewoordvoerder, het aan Maroela Media gesê Anne Smith (86) is Woensdagoggend in ʼn hospitaal oorlede. Sy was in ʼn kritieke toestand toe sy in die waakeenheid opgeneem is en het bloeding op haar brein gehad.

Volgens Labans het Smith nooit dermate herstel dat die polisie ʼn verklaring by haar kon afneem nie. Hy het bevestig dat die saak van poging tot moord nou na moord omgeskakel is.

Maroela Media het vroeër berig ʼn buurman van Smith het op 28 Mei omstreeks 13:00 gesien hoe twee mans uit haar erf in Marthastraat in Kammapark spring. Hy het die verdagtes agternagesit en hulle het ʼn sak met waardevolle besittings, soos ʼn skootrekenaar en kameras, laat val.

Die buurman en ander inwoners is daarna na Smith se huis waar hulle haar in ʼn plas bloed op die vloer aangetref het. Sy is vermoedelik met ʼn hamer aangerand toe sy die mans betrap het terwyl hulle haar huis geplunder het.

Smith woon saam met haar volwasse seun wat doof en verstandelik gestrem is. Hy is ongedeerd gevind, maar kan nie vir die polisie sê wat gebeur het nie.

Labans het Donderdag gesê niemand is nog in verband met die voorval in hegtenis geneem nie, maar die polisie volg tans sterk leidrade op.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

18 Kommentare

jongste oudste gewildste
anje

Wat gaan nou van haar arme seun word. Een mens se wreedheid se dade strek soveel verder as wat hul kan dink, of omgee…

Sussie

Ag HERE hou die familie en die tannie se kinders styf van en vertroos hulle, hoe vergewe en vergeet jy as jou MA met n hamer dood gemaak is? my hart pyn vir haar seun wat in die huis was. Tannie Anna RIV, loop op strate van goud, ken geen pyn, lag elke dag!!!! want U is nou veilig by JESUS voete.

riana

Ja julle dit is wreed. Here gaan met daardie kind hou hom sterk en glo een van die familie sal hom vat en ook n goeie huis gee soos sy moeder het.
Mense die lewe raak baie erg en dit maak mens bang mens weet nie meer watter kant toe nie. More is jy daar en net so kan jou lewe weg gevat word onnodig.

Piet

Die ma was 86 en sy het nog omgesien na haar gestremde kind wat boonop nog doof is ook. Meer weerloos sal jy in die wereld nie kan vind nie. Die tragedie is dat die wereld nie juis gaan stilstaan nie. As hulle ander opsies gehad het sou die kind tog seker nie nog by sy ma gewoon het nie. Sy het reeds haar lewe opgeoffer vir hom, nou is hy oorgelaat aan die genade. Sal dit SAUK dit uitsaai!? Die duiwel is los in die land, of regeer hy eerder die land?

Siek en sat

NOG n sinnelose rassehaat moord wat soveel hartseer en verdriet meebring. En nogsteeds se ons President nie n woord noe.