Die Pretoriase hooggeregshof het borgtog aan Bongani Sandiso Ntanzi (33), die tweede beskuldigde in die moordsaak van die sokkerster Senzo Meyiwa, geweier.
Ntanzi en sy vier medebeskuldigdes staan tereg op aanklag van moord, poging tot moord, roof met verswarende omstandighede, die besit van ʼn onwettige vuurwapen en ammunisie.
Ntanzi het sy aansoek om op borgtog vrygelaat te word op 13 Oktober verlede jaar ingedien.
Lumka Mahanjana, woordvoerder van die Nasionale Vervolgingsgesag, sê Ntanzi het in sy beëdigde verklaring aangevoer dat hy nie ʼn vlugrisiko inhou nie, nie ʼn gevaar vir die publiek inhou nie en ook nie op enige manier by die saak of getuies in die saak sal inmeng nie.
“Adv. George Baloyi, vir die staat, het egter Ntanzi se borgtog teengestaan. Hy het die beëdigde verklaring van die ondersoekbeampte ingedien wat sê dat Ntanzi oor sy alibi gelieg het asook oor sy bankrekeninge wat gevries is en dat hy deur die polisie aangerand is.
“Hy het ook geen verifieerbare adres in Guteng nie,” het Mahanjana gesê.
Die regter het saamgestem dat die beskuldigde nie buitengewone omstandighede kon aanvoer om op borgtog vrygelaat te word nie.
Die aansoek is gevolglik van die hand gewys. Die verhoor sal op Dinsdag 2 Mei hervat word.