Bevelvoerder gaan motoris ontmoet ná polisie glo ongeskik optree

‘n Skermgreep uit die video. Dit is reeds duisende keer op sosiale media gedeel.

Die bevelvoerder van die Lyttelton-polisiestasie in Centurion gaan met Carien Coelho vergader nadat sy vandeesweek ʼn video op sosiale media gedeel het waarin gesien kan word hoe lede van dié stasie haar laatnag aftrek.

Die video volg kort op nóg ʼn video waarin gesien kan word hoe Kymie du Toit, ʼn kleuterskoolonderwyseres, op die aand van 26 November omstreeks 23:25 by ʼn vulstasie in Moreletapark deur beamptes van die Tshwane-metropolisie uit haar motor gepluk en rondgestamp word voor hulle haar geboei en in ʼn gemerkte metropolisie-bussie gestop het.

Die video het groot opslae gemaak en skerp kritiek op die metropolisielede se optrede ontketen.

In die jongste voorval is ʼn video gedeel waarin die woordewisseling tussen Coelho, wat laataand na ʼn fliek saam met haar jong kinders op pad huis toe was, vasgevang word. Coelho is omstreeks 23:00 in Centurion deur die polisielede beveel om stil te hou. Sy het haar noodligte aangeskakel en haar spoed beduidend verminder, terwyl sy na die naaste vulstasie gery het.

Die beamptes volg haar tot daar en by die vulstasie aangekom, vra een van die beamptes of sy nou “tevrede is” dat sy daar stilgehou het.

Sy dring by die beamptes aan dat sy toegelaat word om by die vulstasie stil te hou, waarna een van hulle haar vra om die wet te respekteer. Hy sê ook dat hy haar besluit om daar stil te hou respekteer.

Coelho vra die beamptes deurlopend waarom sy afgetrek is en sê aan hulle dat sy reeds drie keer gekaap is. Sy sê ook aan hulle dat hulle haar kinders ontstel en bied aan om haar bestuurderslisensie vir hulle te wys.

Daar kan later in die agtergrond gehoor word hoe een van die kinders snik.

Een van die beamptes sê dan aan Coelho sy moet haar houding verander en dat daar op haar geskiet kan word indien sy in die toekoms nié stilhou wanneer sy beveel word om dit te doen nie..

Die video het weereens groot kommentaar ontlok. Talle mense het op sosiale media aangedui dat hulle snags te bang is om stil te hou wanneer die polisie, of diegene wat hul voordoen as polisielede, hulle beveel om dit te doen.

Brig. TP Matlala, stasiebevelvoerder van die Lyttelton-polisie, het bevestig dat die polisielede aan dié polisiekantoor verbonde is. Volgens hom is geen klagte teen die betrokke lede aanhangig gemaak nie.

Matlala het gesê hy was reeds persoonlik in kontak met Coelho en dat hulle binnekort by die stasie sal vergader om die voorval te bespreek.

“My lede het hulle werk gedoen en sy het reg opgetree deur na ʼn veilige plek te ry. Die polisielede het haar ook toegelaat om dit te doen,” het Matlala gesê.

“Ek dink kommunikasie in só ʼn geval is uiters belangrik, dit is deurslaggewend.”

‘Bloulig-protokol’

Justice Project SA (JPSA) het vroeër aangekondig dat hy sy goedkeuring van die sogenaamde Bloulig‑protokol, wat hy in 2013 in samewerking met die Padverkeersbestuurskorporasie (RTMC) ontwikkel het, terugtrek.

Die protokol is destyds ontwikkel om die vlaag voorvalle waar misdadigers blou ligte op hul voertuie gebruik het om niksvermoedende motoriste te teiken, te help stuit.

Een van die riglyne in die protokol was dat motoriste aan die polisie wys dat hulle die opdrag om stil te hou verstaan, deur byvoorbeeld hul noodligte aan te skakel, en dan stadig tot op ʼn veilige plek te ry en daar stil te hou.

How do you Protect your Family with a Police Force with this Attitude??? And please listen to the video carefully!!!

Posted by Burgert Coelho on Tuesday, 17 December 2019

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

70 Kommentare

jongste oudste gewildste
Disselboom

Die punt wat eerstens aangespreek moet word, is wat die polisie die reg gegee het om met blouligte en wat alles die motoris van die pad te wou trek? Nie of die motoris toe reg op verkeerd opgetree het nie. As die verkeerde optrede van die polisie nie in die kiem gesmoor word nie, lê daar swaar tye en waarskynlik konflik en toenemende spanning voor.

JW

Carien- ASSEBLIEF as jy kans sien om met die Bevelvoerder te gaan vergader vat ASB jou prokureur saam as getuie en moenie alleen gaan nie- jy gaan beslis weer aan die kortste end trek want die bevelvoerder gaan weer kom met allerhande verskonings soos n gebrek aan kommunikasie tussen jou en die lede ensovoorts ensovoorts
EN moenie val vir hulle verskonings nie laat jou prokureur die praatwerk doen

Justice

Daar is sekere elemente in die SAP wat onopleibaar is.

ADK

Cyril en die minister van polisie behoort hulle te skaam vir wat die publiek van die polisie dink. Baie polisiemanne is al vasgetrek vir kriminele oortredings, meeste van hulle is korrup. Van hulle verhuur hulle uniforms en wapens uit en laatnag slaan hulle toe op soft targets en blameer mense vir hulle houding, gelukkig het die vrou geen houding gehad nie ek wil net graag weet hoekom hulle dit nodig geag het om haar te probeer aftrek, het sy verdag voorgekom met 2 kinders in die kar, belaglik, onnodig. Een woord vir vir hulle almal…DINGAAN. Nodeloos om te sê hulle… Lees meer »

Trudy

Maar die polisibeampte het dan in die video gevra wat beteken dit dat sy haar noodligte aangesit het.. Rerig… Hierdie was nou weer blatante..”kom ek wys jou wie is baas” geval!