Cele tevrede met sentrumveiligheid ná strooptogte in KZN

Verskeie winkelsentrums is verlede week geplunder en is steeds net vir noodsaaklike inkopies oop. (Foto: SA Polisie)

Drie KwaZulu-Natalse winkelsentrums wat verlede week kwaai deurgeloop het toe duisende mense die winkels ingevaar en op tientalle strooptogte gegaan het, sal na verwagting binne dae weer ten volle operasioneel wees.

Die minister van polisie, Bheki Cele, het Maandag met die bestuurspanne van die Liberty-winkelsentrum in Pietermaritzburg, asook die Gateway- en Pavilion-sentrum in Durban vergader. Hulle het ʼn omvattende veiligheidsplan aan die minister voorgelê wat in oorleg met die polisie opgestel is.

Polisielede en private veiligheidsmaatskappye het sedertdien saamgewerk om die sentrums te beveilig om enige verdere plundering en geweld te verhoed.

“Al die sentrums is tans net oop vir noodsaaklike inkopies, maar behoort volgens hul onderskeie veiligheidsplanne binne die volgende paar dae ten volle operasioneel te wees,” sê Lirandzu Themba, Cele se woordvoerder.

Cele het Maandag met die bestuurspanne van die sentrums en winkels vergader. (Foto: SA Polisie)

Cele het gister ook by veiligheidsmagte in Durban se sakedistrik aangesluit waar hulle opvolgwerk doen oor wenke van die gemeenskap oor waar gesteelde items wat verlede week geplunder is, gestoor word.

Volgens die minister sal die herwinning van gesteelde goedere in KwaZulu-Natal en Gauteng voortgaan en by stoorfasiliteite van die polisie geberg word.

“Ons is dankbaar vir gemeenskappe wat steeds inligting verskaf wat die polisie kan help en ons loof mense wat vrywillig die gesteelde buit teruggee,” sê Cele.

“Indien hulle kies om die gesteelde items in hul huise te hou, word hulle gewaarsku dat die reg geen genade gaan betoon nie.”

Sommige van die gesteelde items waarop die polisie reeds beslag gelê het. (Foto: SA Polisie)

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

22 Kommentare

jongste oudste gewildste
Tiptol

Hoed, nou is jy weer voor op die wa. Sigbaar, spraaksaam en doenig. Te min te laat. Jy moet jou pos groet.

Strandloper

Asof hy al oooooooit iets posetief gedoen het? Was dit regtig nodig om die naam so baie te noem? Ek is nou van voor af bevoeterd!

Logies

Goed gaan by die polisie gestoor word, sê jy my? Ek sien ‘n aansienlik ryker toekomstige polisiemag in die kristalbal…

Willem

Loof die dief wat goedere vrywillig terugbring???Arresteer hom!!!!

Pieter

Cele kom se jy eerder vir ons waar is die miljoen lewendige rontes amunisie wat weg is. Jy hoort in die tronk saam zuma. Jy is een groot grap soos jou anc regering vir wie jy werk.