DA-leier ontken leierskapklasse van FW

Mmusi Maimane, leier van die DA, het ontken hy het leierskapklasse van oudpres. FW de Klerk ontvang.

Die Mail & Guardian het Vrydag ʼn berig op sy voorblad gedra getiteld “Uproar over Maimane’s ‘lessons’ with FW”. Die berig het Vrydagoggend vinnig tot ʼn herrie op sosiale media gelei nadat Maimane en die DA se woordvoerders die berig as onsin afgemaak het.

“Terwyl rassespanning in die land toeneem, weier die DA-leier om kommentaar te lewer op wydverspreide bewerings in die party dat hy ‘leierskaplesse’ ontvang van apartheidsera-president De Klerk,” berig die weeklikse koerant op sy voorblad.

Maimane het egter teruggekap op Twitter en gesê die berig is loutere onsin. “As leier van die opposisie, ontmoet ek gereeld met voormalige leiers en staatspresidente. Ek het oudpres. De Klerk een keer in 2014 ontmoet, net soos ek onlangs met oudpres. [Thabo] Mbeki ontmoet het. Dit is nie ʼn storie nie.”

Volgens die Mail & Guardian se berig het vier bronne in die DA se binnekring glo bevestig Maimane het verskeie kere met De Klerk ontmoet.

Verashni Pillay, redakteur van die Mail & Guardian, het intussen ook op Twitter gesê hulle volstaan met die berig en diegene wat nie daarmee saamstem nie, is welkom om die persombudsman of die howe te nader.