‘Departement hou ons gyselaar’ – egpaar wat wil emigreer

Argieffoto bloot ter illustrasie.

’n Kliniese navorser van Pretoria gaan weens ’n gesloer by die departement van binnelandse sake waarskynlik nie betyds by haar nuwe werk in Nederland kan begin nie. Dít ten spyte daarvan dat sy ’n jaar vooraf vir die nodige dokumente begin aansoek doen het.

Nicolette Delport het vroeër vanjaar ’n geleentheid losgeslaan om vanaf 1 November in Amsterdam te gaan werk. Sy en haar man, Clemon, het ter voorbereiding van hul nuwe lewe in die vreemde reeds hul huis en motors verkoop. Clemon moes boonop reeds kennis by sy werk gee.

Die egpaar wag egter nog op ’n onverkorte geboortesertifikaat wat reeds in November verlede jaar aangevra is, asook hul huweliksertifikaat wat die departement nou kwansuis nêrens op sy stelsel kan opspoor nie.

Nicolette sê dis asof hulle “gyselaar” gehou word.

“Dit voel asof ek vasgevang is in ’n land wat my nie wil hê nie, maar my ook nie wil laat gaan nie.”

Delport het in November verlede jaar van die werksgeleentheid in die vreemde te hore gekom en toe reeds aansoek gedoen vir haar en haar man se onverkorte geboortesertifikate. Dié dokumente word benodig om aansoek te doen vir ’n visum.

Daar is aanvanklik aan die egpaar gesê dat die dokumente in ses tot agt weke uitgereik sal word.

Clemon se onverkorte geboortesertifikaat het vyf maande later in April vanjaar gekom, terwyl Nicolette nog op haar geboortesertifikaat wag.

Die egpaar is boonop in April in kennis gestel dat hulle ’n meer onlangse afskrif van hul huweliksertifikaat sal benodig en hulle het aansoek gedoen dat die onverkorte sertifikaat weer gedruk word. Daar is toe aan die egpaar gesê dat hul huweliksertifikaat nie meer op die stelsel is nie en dat dit óók agt weke sal neem.

Volgens Nicolette kon daar geen verduideliking gegee word oor waarom hul huweliksertifikaat nie op die stelsel is nie.

Verskeie besoeke aan ’n kantoor van binnelandse sake (en ure lange toustanery) later wag die egpaar steeds op die uitstaande geboorte -en huweliksertifikaat.

Die egpaar het selfs ten duurste ’n agent aangestel om namens hulle hul aansoeke op te volg. Ook die agent kon g’n hond haaraf maak nie, terwyl die tyd naderkruip vir die egpaar om die land te verlaat.

“[Binnelandse sake] verhoed my om ’n beter toekoms vir myself en my gesin te skep.

“My familie kom van Zimbabwe. Ons is daar uitgejaag toe ek ’n baba was en ons het na Suid-Afrika gekom vir ’n beter lewe. Ons het dit nie gekry nie en dis hoekom ons nou ’n beter lewe in Nederland gaan soek,” vertel ’n raadop Nicolette.

Maroela Media het ’n navraag aan die departement van binnelandse sake gestuur en wag op terugvoer.