(Argieffoto)
Die Fidelity Services Group sê hoewel voertuigkapings in die algemeen toeneem, hy geen spesifieke styging in kapingsvoorvalle oor die feestyd aangeteken het nie.
Wahl Bartmann, uitvoerende hoof van die veiligheidsmaatskappy, sê dit is beslis goeie nuus.
“Ons doen egter voorbereidings aangesien data tot ons beskikking aandui dat ʼn moontlike toename in kapings vanaf Januarie en Februarie kan voorkom.”
Hy sê voertuigkapings is ʼn misdaad wat hoofsaaklik deur vraag en aanbod gedryf word.
“Gevolglik teiken kapers spesifieke voertuie vir ’n spesifieke doel en mark. Die vraag na Toyota-, Volkswagen-, Ford- en Nissan-voertuie bly hoog op die swartmark.”
Gegrond op die Fidelity SecureDrive-basis vir 2023 en 2024, is dié modelle ook dikwels in kapers se visier:
- Toyota Fortuner (GD6 en D4D)
- Toyota Hilux (GD6 en D4D)
- Toyota Corolla Cross
- Toyota RAV 4
- Volkswagen Polo (veral luikrugmodelle)
- Nissan NP 200
- Ford Ranger (dubbel- en enkelkajuit)
Bartmann sê kapers het ook nutsvoertuie en vragmotors – wat vir die vrag geteiken word – in hul visier.
“Die meeste kapers teiken slagoffers by of naby hul wonings of werkplekke.
“’n Nuwe neiging is ook geïdentifiseer waarin die kapers hul slagoffers ontvoer het om te help om die satellietopsporingstoestel te vind en om die aanmelding van die voorval te vertraag,” sê Bartmann.
Hy sê ongeveer 30% van alle gesteelde en gekaapte voertuie word oor die grens na buurlande gesmokkel.
“Ons wil die publiek aanraai om altyd bewus te wees van hul omgewing en waaksaam te bly vir enige voertuie wat hulle moontlik agtervolg.
“As hulle vermoed dat hulle gevolg word, moet hulle dadelik na die naaste polisiestasie ry of minstens na ʼn besige sentrum waar ander mense in die omgewing is.”
Bartmann se raad is ook om nie tydens ʼn kapingsvoorval weerstand te bied nie.
“Onthou dat kapers altyd gewapen is en sonder huiwering sal skiet wanneer hulle gekonfronteer word. Nog rowers kan buite sig staan en skote op jou afvuur indien jy probeer terugveg.
“’n Kaping kan op enige plek en enige tyd gebeur. Die beste reaksie is om wakker en bewus te wees van enige verdagte aktiwiteit naby jou.”
30% Oor grens
Word wakker mnr Cele of gaan vir ewig weg
Dis twak dat rowers ons lewens gevange hou!
En dis hoekom n mens jou gaai af betaal vir versekering as jy een van daai karre of bakkies ry..
As ‘n beskermingsmaatreël het ek die Porche logo op my kar vervang met diè van ‘n Corolla. Toe vind ek uit dat die Toyota Corolla een van die meer gewilde keuses is.
1. Ek sal maar aanhou om my 2011 i20 met sy duik agter te ry. Glo nie iemand sal hom wil he nie.
2. Min mense kan werklik daardie duur voertuie en versekering bekostig
3. Dit sal ook nie help om na die naaste polisie stasie te ry nie – ons polisiestasie maak ses uur of sewe uur in die aand toe.
Dit is die regering se onvermoë of dalk hul taktiek om uitlanders toe te laat om RSA in te kom en te plunder en verkrag. Motief maak nie sin nie. Hoekom jou mense(famielie) in armoede te dompel? Hul werk en toekoms te ontneem en vir buitelanders gee. Maak eenvoudig nie sin nie. Word ons nie regeer deur Suid Afrikaners nie? Laat my wonder.
Wie is hierdie regering? Wat is hulle eintlike agenda? Net self verreiking? Geen misie visie krag gesondheid sekerheid veiligheid veilige paaie ekonomie water basiese noodsaaklikhede
Poliese beskerming.
My seun gekaap met n 19 voerstek ou kar en doodgeskiet, het tot die kar teruggekry. Wees waaksaam