Droogtekrisis: Gebruik water slegs vir drink, bad en kook

Argieffoto (Foto: weronica0, Pixabay)

Die Stad Kaapstad het ʼn waarskuwing aan alle ondernemings en inwoners in Kaapstad uitgereik om alle nie-essensiële gebruik van munisipale water dadelik te staak.

Die burgemeersterskomitee sal na verwagting Dinsdag die raad aanraai om dadelik vlak 4-waterbeperkings in te stel. Dit sluit ʼn verbod in op die gebruik van munisipale water vir buitegebruik en nie-noodsaaklike doeleindes.

Damvlakke in die Wes-Kaap staan tans op 21,2%, dit is 0,8% laer as ʼn week gelede. Met die laaste 10% van ʼn dam se water wat grootliks nie bruikbaar is nie, beteken dit dat die damvlakke tans effektief op 11,2% staan.

Die jongste verbruik het weer gestyg tot 718 miljoen liter water, dit is 118 miljoen liter water te veel as die teiken van 600 miljoen liter.

“Ons sê dat jy slegs toegelaat word om ʼn bietjie water te gebruik om te drink, mee te kook en mee te was. Ons het ʼn kritieke punt in die droogtekrisis bereik,” het raadslid Xanthea Limberg gesê. “Dit is nie ʼn versoek nie. Alhoewel ons onophoudelik daaraan werk om verbruik te verminder, bly die algehele verbruik katastrofies hoog. Ons moet almal meer doen.”

Limberg het gesê die stad het nou ʼn punt bereik waar alle gebruikers minder as 100 liter water per dag moet gebruik. “Moenie toilette spoel wanneer dit nie nodig is nie. Stort vir minder as twee minute per dag of gebruik ʼn nat lap om jouself mee skoon te maak. Vang alle water op en gebruik dit, onder andere, om toilette mee te spoel.”

Die stad het reeds met baggerwerk by die Voëlvleidam begin om voor te berei vir die onttrekking van lae vlakke water. Die stad werk ook saam met die nasionale departement van water en sanitasie vir dringende baggerwerk by Theewaterskloofdam.

Die stad sit ook sy program voort om waterdruk te verminder. Ander noodingrypings is ook aan die gang.

“In ʼn erge droogte, soos ons tans beleef, is die enigste werklike ingryping om verbruik te verminder. Ons moet die verbruik binne die volgende week met 100 miljoen liter water per dag verminder. Die stad waarsku ook besighede om gebeurlikheidsplanne of alternatiewe watermaatreëls te implementeer.”

* Gebruik water slegs om te drink, mee te kook en te was
* Spoel slegs die toilet wanneer dit noodsaaklik is
* Stort slegs vir twee minute lank
* Vang alle stort, bad en wasbakwater op en gebruik dit om die toilet mee te spoel
* Ontdooi kos in die yskas of natuurlik, eerder as om dit onder water te laat ontdooi
* Gebruik ʼn glas wanneer jy tande borsel of skeer, eerder as om die kraan te laat loop
* Wag vir ʼn volle bondel voordat jy ʼn wasmasjien of skottelgoedwasser gebruik
* Gebruik ʼn doeltreffende stortkop wat nie meer as 10 liter water per minuut gebruik nie

Hoe om lekplekke op te spoor:
* Maak alle krane toe op die eiendom en moet nie toilette spoel nie
* Skryf jou watermeterlesing neer
* Wag 15 minute en skryf weer die watermeterlesing neer
* As daar ʼn verskil is, het jy ʼn lekkasie
* Ontbied ʼn loodgieter indien jy dit nie self kan regmaak nie

ʼn Toilet wat lek gebruik tussen 2 600 en 13 000 liter water per maand, afhangende van die vloeitempo van die lekplek. ʼn Kraan wat lek mors maandeliks tussen 400 en 2 600 liter.

Inwoners kan ʼn e-pos stuur aan [email protected] vir navrae of om oortredings aan te meld (voeg bewyse by), of stuur ʼn e-pos aan 31373.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Johan. H.

Kry julle jammer. Top bestuur moet in die goeie jare dink aan investering, damme bou , elektrisieteit, paaie. moenie wag vir die ramp nie, want hy kom dis net tyd,,,NKandla se geld kon seer ekerlik n dam bou ????

Gideon Roos

Dis kommerwekkend om te sien dat die kaap so droog is. Hopelik kry hulle goeie reën hierdie winter.

Jennifer

Die rioolstelsel moet nie gebruik word vir die spoel van sanitere produkte, wetwipes ens. Die stelsel blok op omdat minder water nie die pype skoon spoel nie.

Boorgat

Geld dit vir die mense met boorgate ook, want hulle is besig om die ondergrondse water klaar te maak en bome is afhanklik van ondergrondse water.

Boorgat

Vertel dit vir die mense met boorgate. Hulle spuit net soos hulle wil. Sommer 12h00 in die dag.