(Argieffoto ter illustrasie: Pixabay)
ʼn Egpaar van Noordwes word daarvan beskuldig dat hulle ʼn ouetehuis in Mahikeng glo uit meer as R2,2 miljoen bedrieg het.
Die paartjie, onderskeidelik 48 en 55 jaar oud, word nou deur vyf aanklagte van bedrog in die gesig gestaar.
Volgens ao. Bonnie Nxumalo, woordvoerder vir die Valke, het die man na bewering in 2015 meer as R2,2 miljoen van die Rotaris-ouetehuis se geld aan die begrafnisonderneming wat hy saam met sy vrou besit, oorbetaal.
Die man was ten tyde van die beweerde bedrog die voorsitter van dié ouetehuis.
Hy het glo voorgegee dat die geld aan ʼn konstruksiemaatskappy vir konstruksiewerk betaal is.
Die saak is by die Valke se ondersoekspan vir ernstige handelsmisdaad in Mahikeng aangemeld, wat verdere ondersoek ingestel het.
Die man en vrou is nou gedagvaar om op 10 Junie in die Mmabatho-landdroshof te verskyn.
