#FeesMustFall-leier doen aansoek om borgtog

Mcebo Dlamini in die hof (17 Oktober 2016). Foto: Brenda Masilela/ANA

Mcebo Dlamini in die hof (17 Oktober 2016). Foto: Brenda Masilela/ANA

Mcebo Dlamini, leier van die #FeesMustFall-betogings en voormalige leier van die studenteraad van die Universiteit van die Witwatersrand (Wits), het Maandag in die Johannesburg-landdroshof verskyn.

Dlamini (32) is Sondag in die vroeë oggendure in Parktown in hegtenis geneem nadat die polisie op die Wits-koshuis waar hy woon toegeslaan het. Hy word aangekla van openbare geweld, diefstal, opsetlike saakbeskadiging en aanranding met die doel om ernstig te beseer.

Dlamini, wat in ʼn groen sweetpakbaadjie en serp geklee was, het kalm voorgekom en stil na die landdros gesit en luister. Dlamini se borgaansoek is tot Dinsdag uitgestel om die staatsaanklaer, adv. Steven Rubin, kans te gee om sy alternatiewe woonadres, wat hy eers vanoggend aan die staat verskaf het, te verifieer.

Mongezi Ntanga, Dlamini se regsverteenwoordiger, het versoek dat sy kliënt onmiddellik vrygelaat word sodat hy Dinsdag kan eksamen skryf. Die landdros het egter gesê aangesien Dlamini al vir ʼn geruime tyd nie klasse bywoon nie, kan hy met die universiteit reël om op ʼn ander datum eksamen te skryf.

Dlamini het ook aangedui dat hy aan asma ly en medikasie daarvoor benodig. Die landdros het gesê sy regspan moet met die polisiestasie waar hy aangehou word reël dat hy die nodige medikasie ontvang terwyl hy in aanhouding is.

Jo Seoka, die Anglikaanse biskop wat die #FeesMustFall-veldtog steun, was ook Maandag in die hof. Ná afloop van die verrigtinge het Seoka gesê hy steun die studente se stryd omdat hul eise opreg is en spruit uit eerlike bedoelings.

“Die inhegtenisneming van studente is regtig onnodig en vererger net die geweld. Hoe meer studente in hegtenis geneem word, hoe kwater raak hulle. Ek is hier om seker te maak daar is geen verdere geweld nie. Dit is belangrik dat die samelewing saamstaan om die voortslepende geweld te beëindig,” het hy gesê.

Dlamini bly by die Cleveland-polisiestasie in aanhouding.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

54 Kommentare

jongste oudste gewildste
Daisy

32?? Goeie genugtig !!

Anel

32 en nog ‘n student? Waarvoor leer hy?

Andre

Die biskop moet liewers by sy huis bly

T

Hoekom studeer hy nog as hy 32 is?

Christopher McCreanor

LMGA…. Uuuuuuhmmmm edelagbare ek moet uhh “eksamen skryf” en moet vrygelaat word! Ja broer jy wil eksamen in klipgooi en brandstigting gaan skryf! Sit met jou agterstewe en asma pompie in die tronk waar jy hoor!