Foto’s: Bfn-onderneming verwoes in brand

(Foto: Verskaf)

Brandbestryders het Woensdag vir sowat drie ure lank gespook om ʼn brand in bedwang te bring wat by ʼn onderneming in die Bloemfonteinse nywerheidsgebied Hamilton ontstaan het.

Houers vol transformator-olie – wat hoogs vlambaar en giftig is – het in die vlamme ontplof, wat dit uiters gevaarlik vir brandbestryders gemaak het.

Volgens Braam van Zyl, afdelingshoof van die Mangaung-metro se brandweer- en reddingsdiens, is die brandweer omstreeks 13:30 na Transformer Field Services in Ben Jones-straat ontbied.

“Met ons aankoms daar het dik swart rookwolke reeds uit die gebou geborrel en die brand was reeds in ʼn gevorderde stadium,” sê Van Zyl.

In daardie stadium het werknemers van die onderneming ook gespook om twee boerboele wat op die perseel vasgekeer was, te red.

“Die honde is ongedeerd, maar een van die manne wat hulle gered het, moes hospitaal toe gejaag word vir rookinaseming.”

Die brandweer het sowat 600 000 liter water, gemeng met skuim, gespuit om die vlamme te blus en die brand is omstreeks 17:00 in bedwang gebring, sê Van Zyl.

Die toneel is daarna aan die eienaar van die onderneming, Pieter le Roux, oorhandig.

Volgens Van Zyl is ʼn ondersoek gelas om die oorsaak van die brand te bepaal.  Volgens inligting het die brand in een van die masjiene ontstaan.

Die omvang van die brand se skade moet ook nog bepaal word, maar volgens die foto’s wat ná die brand aan Maroela Media beskikbaar gestel is, is dit duidelik dat ʼn groot gedeelte van die onderneming vernietig is.