(Foto: Facebook/Janita Doyer)
Janita Doyer, ʼn bekende perderuiter wat ernstig beseer is nadat die perd waarop sy gery het, gestruikel het, vaar stukke beter en is ondanks ʼn paar terugslae “steeds haar positiewe self”.
Maroela Media het vroeër berig die reis waaraan Doyer deelgeneem het, het oor ʼn roete van 117 km en vier dae gestrek. Die groep was te perd van Dullstroom tot op Belfast op pad en het talle geskiedkundige persele op die pad besoek.
Doyer was verlede Maandag, op die laaste dag van die reis, op haar gunstelingtoerperd na die laaste monument onderweg toe die noodlot getref het. Met die val het Doyer haar nek gebreek, opgehou asemhaal en haar hart het gaan staan.
Janita Doyer soos baie haar ken op een van haar perde. (Foto: Verskaf)
Sy is dadelik na die Life Midmed-hospitaal op Middelburg in Mpumalanga gehaas waar sy steeds vir haar beserings behandel word. Doyer het intussen longontsteking opgedoen en moes op ʼn ventilator geplaas word.
Reeds verbetering in toestand
Sy het egter Vrydag vir die eerste keer opgestaan, het Nellie Tromp, haar dogter, aan Maroela Media gesê.
“Die dokters het nou haar nekstut afgehaal. Hulle sê haar nekstruktuur lyk stabiel, maar sy het ʼn ernstige spinale besering opgedoen. Haar arms gaan moontlik nooit weer dieselfde wees nie.
Janita Doyer, op haar gelukkigste saam met een van haar perde. (Foto: Verskaf)
“Sy is steeds op die ventilator en kan nie met ons praat nie. Ons het egter vir haar ʼn alfabetkaart gemaak sodat sy daarmee met ons kan kommunikeer.
“Sy kan nou weer begin rondbeweeg en op ʼn stoel sit. Sy gebruik haar linkerarm – wat darem nie heeltemal verlam is nie – om deur die kaart met ons te gesels, maar sy sukkel baie om haar regterarm te gebruik. Haar arms het baie verswak en ons weet haar fyn motoriese bewegings sal nooit weer dieselfde wees nie. Sy sukkel ook nog vreeslik om iets op te tel en sy raak baie vinnig moeg.”
Tromp sê haar ma vorder egter elke dag en daar is ook reeds verbetering in haar longfunksie.
“Dit bly maar in hierdie stadium vir ons die grootste kommer. Sy het nog steeds longontsteking, maar die dokters kon vasstel watter bakterieë in haar longe is en het haar nou op ander antibiotika geplaas. Die dokters het ook ʼn trageostomie gedoen, so hulle sal haar nou in fases van die ventilator begin afhaal.
“Ons kan nie wag om net weer haar stem te hoor nie,” sê Tromp.
Wat langtermyn-komplikasies betref, bly die funksie van Doyer se arms maar ʼn groot kommer.
“Met ʼn spinale besering sal mens egter eers later kan vasstel hoe ernstig dit is.
“Maar sy is baie sterk en sy bly ongelooflik positief. Sy is op en wakker en wil presies weet wat aangaan en wat die uitkoms gaan wees. Daar is nog hoop dat daar verbetering sal kom, maar haar arms sal nooit weer dieselfde wees nie.”
Tromp sê hulle kry daagliks bemoedigende boodskappe, “geliefdes en die gemeenskap bly bid”. Die perderuitergemeenskap is veral besorg en wil daagliks weet hoe dit met haar gaan.
Janita Doyer is landwyd bekend vir haar Arkab Arabier-stoetery. (Foto: Verskaf)
“Sy doen elke dag oefeninge saam met fisioterapeute. Die eerste prioriteit was om haar lewe uit gevaar te kry. Die tweede prioriteit is om haar nou weer aan die beweeg te kry. Ons sal dan eers kan begin vasstel hoe die uitdagings vorentoe gaan lyk.
“Dinge kan nog baie verander, spinale beserings is uiters kompleks.”
Tromp sê hulle wil nou net graag weer met hul ma gesels. Janita se man, Van Duyn, kry veral swaar sedert haar ongeluk.
“My ma is sy sielsgenoot, hy het haar so lief en mis haar stem baie. Elke klein stukkie vordering wat sy toon, is vir ons fantasties.”
Die Doyers se seun wat in Nieu-Seeland woon, het ook die eerste moontlike vlug gehaal om sy ouers by te staan.
“Nou pak ons hierdie situasie soos ons alles sal pak; dit het gebeur en al wat ons kan doen, is om vorentoe te kyk.”
Op die vraag of Doyer weer sal kan perdry, antwoord Tromp skertsend: “Sy sal ʼn manier vind.”
