Gesin vlug met hond en twee tasse

Yana en Shaun van Wyk by hul dogter, Taylor. (Foto: Verskaf)

Shaun van Wyk (30) en sy jong gesin het verlede week met net twee tasse en hul hond uit die stad Ternopil in die weste van Oekraïne gevlug, nadat Rusland dié land Donderdag ingeval het. Die meeste van hul besittings het in hul huis agtergebly en daar is selfs nog ʼn bietjie skottelgoed in die wasbak.

Van Wyk se Oekraïense vrou, Yana (28), en hul dogter, Taylor (5), is tans in Pole, waar hulle by ander barmhartige Suid-Afrikaners tuisgaan. Die gesin het Donderdagoggend met hul motor vertrek en Vrydagaand in Pole aangekom. Hulle was uiters bang dat hulle by die grens weggewys sou word, maar glo dat hulle met die Here se genade die land kon binnegaan.

Van Wyk kom oorspronklik van Hartbeespoortdam in Noordwes, maar woon al die afgelope ses jaar in Oekraïne. Hy is in die IT-bedryf en bestuur ook saam met sy vrou ʼn masseringsalon.

“Die hele ervaring was vir ons verskriklik erg. Daar is al jare lank probleme in Oekraïne, maar almal het maar gedink dis dalk net leë bedreigings.

“Toe ek Donderdag met vegvliegtuie bo ons huis wakker skrik, het ek dadelik die nuus gaan lees en besef die moeilikheid is hier. So ʼn halfuur later het ʼn sirene deur ons dorp weerklink wat beteken het hier is oorlog.”

Van Wyk sê hy het sy familie aangesê om dadelik te pak sodat hulle kan vlug.

Shaun en Yana van Wyk by hul dogter, Taylor. (Foto: Verskaf)

“Dit was stresvol. Ek het gebewe van al die adrenalien in my lyf. Ek het met my familielede kontak gemaak, gesê ons gaan vlug en gevra dat hulle vir ons bid. Daarna het ek ʼn bonatuurlike kalmte ervaar.”

Hy sê hy het sy dogtertjie probeer opgewonde maak oor hul reisuitstappie sodat sy nie bang hoef te wees nie.

Van Wyk sê hy dink egter hy ly nou nog aan skok.

“Selfs as ek net die geluid van ʼn trein hoor, dan dink ek weer aan daai sirene en skiet daar ʼn koue rilling deur my lyf.”

Hy sê baie Suid-Afrikaners in die buiteland het hulle bygestaan.

“Die Suid-Afrikaners hier maak hul deure vir ons oop en gee vir ons slaapplek. Dis regtig fantasties. Die goed wat ons agtergelaat het, het bloot materiële waarde. Ons probeer nou net kalm bly. Ons beskou dit as ʼn uitdaging en weet dat ons baie ondersteuning het. Ons weet dit gaan orraait wees,” het hy Maandag bewoë aan Maroela Media gesê.

“Hulle kort nou hulp”

Gilbert Martin van die People of South Africa-stigting, ʼn niewinsgewende organisasie, staan verskeie Suid-Afrikaners in Oekraïne en Rusland by en help hulle om uit dié lande te vlug.

Hy sê sowat 200 mense, onder wie Suid-Afrikaanse studente, is reeds suksesvol na buurlande wes van Oekraïne verplaas.

Die stigting werk nou saam met verskeie ambassadeurs in Oekraïne en Rusland, asook buurlande en oud-Suid-Afrikaners in ander lande, om Suid-Afrikaners se veiligheid te verseker.

’n Brand word geblus in Koshytsastraat in Oekraïne se hoofstad, Kiev. (Foto: AFP)

“Ons is baie bekommerd oor die mense daar. Dis verskriklik erg.”

Martin sê daar is ook baie Suid-Afrikaanse studente wat binnekort eksamens in Oekraïne en Rusland sou aflê en nou nie hul internasionale grade kan voltooi nie.

Dié studente, wat in baie gevalle met beurse studeer, weet nie wat nou van hul voornemende loopbane word nie en het ook nie geld om na Suid-Afrika terug te keer nie. Dit geld ook vir baie ander Suid-Afrikaners wat nou moes vlug.

Martin sê die stigting het onder meer ten doel om geld in te samel om Suid-Afrikaners na die land terug te bring en hulle te hervestig wanneer hulle in die land aankom.

“Ons hoop dat niemand ooit in daai mense se skoene sal wees nie. Hulle het ons hulp nou verskriklik nodig. Ons doen ʼn beroep op mense en ondernemings om betrokke te raak en hulp te bied.”

Mense wat betrokke wil raak, kan hul Facebook-blad besoek of vir Martin ʼn e-pos stuur na [email protected].

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

27 Kommentare

jongste oudste gewildste
Plaaskind

Die gras is tog nie altyd groener aan die ander kant van die draad nie. Almal wat SA verlaat, ander lande het ook maar hulle probleme. Ek sê maar net. Ek voel tog baie jammer vir die gesin, veral die ou dogtertjie.

Kokerboom

Bly hul is veilig. Weereens grootskaalse vernietiging en onnodige menseverlies deur ‘n magsbehepte despoot

Stofdonkie

Is die probleem in Oekraiene nie in die Ooste van die land nie? Is dit onnodige histerie aangevuur deur media wat Putin net probeer in slegte lig stel?

Dries

Bly liewer in Poland. Hier gaan dit net so sleg. Ramaphosa het reeds sy steun vir Rusland uitgespreek

quartus

Oos Wes, tuis bes !!