Gesondheidsversekering ten sterkste in parlement veroordeel

Argieffoto (Foto: DarkoStojanovic/Pixabay)

AfriForum het vandag die organisasie se insette oor die wetsontwerp op Nasionale Gesondheidsversekering (NGV) voor die parlementêre portefeuljekomitee vir gesondheid gelewer.

Dié wetsontwerp behels die nasionalisering en monopolisering van die gesondheidsektor, asook die vernietiging van privaat mediese fondse. AfriForum het in sy voorlegging talle redes verskaf oor waarom die wetsontwerp katastrofies vir Suid-Afrika sal wees. Die burgerregteorganisasie het geargumenteer dat die voorgestelde wet, soos ander maatskappye in staatsbesit, vatbaar sal wees vir korrupsie en wanadministrasie, maar dat die implementering daarvan ook onbekostigbaar vir belastingbetalers sal wees en dat dit sal lei tot die massa-emigrasie van gesondheidswerkers.

“Die regering gebruik NGV as ’n manier om stemme by arm Suid-Afrikaners te werf, wat geldige griewe oor die gehalte van gesondheidsorg in Suid-Afrika het. NGV sal egter nie ’n oplossing vir hierdie probleme wees nie. Dit sal inteendeel die algehele toegang tot gehalte gesondheidsorg verlaag deur privaat gesondheidsorg te vernietig,” het Reiner Duvenage, AfriForum se veldtogbeampte vir strategie en inhoud, tydens die voorlegging gesê.

“Die ware koste en dienste wat nodig gaan wees vir NGV, is heeltemal onbekend, maar ten spyte hiervan word dit steeds op die alreeds oorbelaste belastingbetaler afgedwing. Deur na die baanrekord van gemonopoliseerde entiteite in staatsbesit te kyk, gaan NGV swaar belas word deur korrupsie, buitensporige burokrasie, wanbestuur en onbevoegdheid,” het Duvenage afgesluit.

AfriForum herbevestig sy onderneming om NGV te beveg. Ondersteun hierdie uiters belangrike saak deur AfriForum se webtuiste oor NGV te besoek

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

10 Kommentare

jongste oudste gewildste
Blomme

Ai die ANC regering weet net hoe om die land op te voeter!

Marius

Hulle sal aanhou afbreek tot niks meer staande bly nie.

Deon

Gesondheidsorg/versekering is ongelooflik buitensporig duur in SA en daar behoort ernstig aandag aan die saak gegee te word. Om egter toe te laat dat gesondheidsorg net in die hande van hierdie regering oorgelaat word, gaan n totale ramp veroorsaak. AfriForum en elke ander instansie wat hierdie absurde wetsontwerp teenstaan moet ondersteun word.

Pieter

Als wat julle anc kommuniste aan raak verander in gemors .Waar gaan julle anc kaders le as julle siek is in stevebiko dit wil ek sien

Darkwing Duck

Hulle kan nie eers ‘n hospitaal in ‘n jaar se tyd herbou en ten volle oopstel nie. dit terwyl duisende pasiente ‘n ander heenkome moet vind. Dis omgee. Wel gedaan.