Groot deurbraak in renosterstropery

Argieffoto Foto: isotherm.co.za

Argieffoto Foto: isotherm.co.za

Twaalf verdagtes, waaronder drie polisiebeamptes, is in verband met beweerde renosterstropery in hegtenis geneem.

“Die verdagtes is onderskeidelik Dinsdag en Woensdag in twee provinsies in hegtenis geneem,” het brig. Hangwani Mulaudzi, woordvoerder van die Valke, in ʼn verklaring gesê.

Die verdagtes is in Gauteng en Noordwes in hegtenis geneem en sal na verwagting Donderdag in die Roodepoort-landdroshof verskyn op aanklag van geldwassery en swendelary, die besit van ongelisensieerde vuurwapens en ammunisie en korrupsie.

“Die groep is al sedert 2013 deel van ʼn ondersoek en was na bewering betrokke by onwettige renosterstropery en onwettige handeldryf in renosterhorings in Klerksdorp, Rustenburg, Pretoria en Johannesburg,” het Mulaudzi bygevoeg. “Die polisie het tydens die inhegtenisneming beslag gelê op 13 onwettige vuurwapens, drie klein skale, een elektriese ystersaag, vier renosterhorings, opgekerfde renosterhoring, R1.1 miljoen kontant en agt luukse voertuie.”

Volgens Mulaudzi beloop die waarde van die gekonfiskeerde goedere, insluitend die kontant, ongeveer R6 miljoen.

‘Operasie Ringleier’ is uitgevoer onder leiding van die Valke in samewerking met die departement van omgewingsake en toerisme, en die Suid-Afrikaanse Polisiediens se forensiesewetenskaplaboratorium en die Nasionale Vervolgingsgesag.

Lt.genl. Mthandazo Ntlemeza, nasionale hoof van die Valke, het die groep geloof vir hul werk om die beweerde sindikaat oop te vlek.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

8 Kommentare

jongste oudste gewildste
alia

Dit is ‘n pragtige foto !!!! Ek hoop hulle sluit die barbare toe en gooi die sleutels vir altyd weg. Ek hoop my kommentaar word nou geplaas.

alida

Ek komplimenteer Maroela met die pragtige foto maar my kommentaar word nie geplaas nie. Wat help dit dan om enigsins ‘n mening te lug.

Elbie

Goeie nuus! Sluit hul op, hulle hoort agter tralies.

Inge

Well done!

BUSFARK VAN PLETSEN

MOOI SO