‘Jub Jub’ se vrylating op parool veroordeel

Jub Jub. Foto: Werner Beukes/SAPA

Jub Jub. Foto: Werner Beukes/SAPA

Die Justice Project SA (JPSA) het Donderdag die vrylating van die kwaito-sanger Molemo “Jub Jub” Maarohanye en sy medebeskuldigde, Themba Tshabalala, veroordeel.

Maroela Media het vroeër berig Maarohanye en Tshabalala is op parool vrygelaat nadat hulle vier jaar, een maand en een dag agter tralies was. Die twee mans is in 2012 aan strafbare manslag skuldig bevind en tien jaar tronkstraf elk opgelê, waarvan twee jaar opgeskort is.

Maarohanye en Tshabalala het op 8 Maart 2010 in ʼn groep skoolkinders in Protea-Noord, Soweto vasgery, terwyl hulle onder die invloed van alkohol en dwelms resies gejaag het. Prince Mohube, Mlungisi Cwayi, Andile Mthombeni en Phomello Masemola is tydens die voorval dood en Frank Mlambo en Fumani Mushwana is met permanente breinskade gelaat.

Maarohanye en Tshabalala is aanvanklik op vier aanklagte van moord en twee aanklagte van poging tot moord skuldig bevind, maar hul skuldigbevindings is later na strafbare manslag omgekeer.

Howard Dembovsky, voorsitter van JPSA, het gesê die twee se vrylating op parool stuur ʼn betreurenswaardige boodskap uit oor padveiligheid. Dembovsky het gesê hoewel drie van die slagoffers se families glo gesê het hulle sal Maarohanye en Tshabalala se vrylating aanvaar indien hulle om verskoning vra vir hul dade, moet daar nie vergeet word dat die twee mans enorme lyding veroorsaak het nie.

Molemo "Jub Jub" Maarohanye (links) en Themba Tshabalala toe hulle aan moord skuldig bevind is. Foto: Werner Beukes/SAPA

Molemo “Jub Jub” Maarohanye (links) en Themba Tshabalala toe hulle aan moord skuldig bevind is. Foto: Werner Beukes/SAPA

Hy het gesê die saak moet die groot gevaar van mense wat onder die invloed van alkohol en dwelms bestuur, beklemtoon. “Die feit dat hierdie twee mans eers aan moord skuldig bevind is, moet in aanmerking geneem word, aangesien dit ʼn invloed het op mense se persepsies van die reg en spesifiek tot watter mate vonnisse as ʼn afskrikmiddel dien,” het hy gesê.

Hy het bygevoeg dat daar meer gedoen moet word om dronk bestuurders te vervolg. “Dit is ongelukkig ʼn feit dat baie min mense wat vir dronkbestuur in hegtenis geneem word uiteindelik suksesvol vervolg word. Dit is grootliks weens die groot en onregverdigbare vertragings om die uitslae van bloedalkoholvlaktoetse terug te kry. Die howe kan en sal natuurlik nie iemand skuldig bevind sonder geloofwaardige en wetenskaplik-bewysbare bewyse in ʼn aanklag waar ʼn spesifieke toelaatbare alkoholvlak voorgeskryf word nie,” het hy gesê.

“Hoewel lang tronkstrafvonnisse as ʼn afskrikmiddel dien vir sommige mense, sal die vlaag van dronkbestuur voortduur vir solank as wat dronkbestuurders dink die kans dat hulle gevang en skuldig bevind sal word, is skraal.”

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

12 Kommentare

jongste oudste gewildste
Nico

En dan volg Oscar die verskriklike seker ook binnekort

Mauzi

Skokkend! 4 mense dood, 2 met breinskade gelaat en 4 jaar later op parool?

PJ

En so sal die dronkbestuur ongelukke voortgaan en mense sal sterf en families sal verwoes word…Wie sal nou afgeskrik wees as die straf so lig is??

Disekdai

JPSA, why don’t we EVER hear your voice about the brutal murdets, atacks, rapes and torturs that is a much more extreme and urgent matter that should be at the top of this country’s priorty list for the past 10 yrs & more that is now exploding while the ANC,DA,IFP, EFF, VF etc are continuing to look the other way while they are too busy with their own personal life, their own parties and functions, their holiday trips, enriching themselves, spending all the moneys of their supporters whom are getting murdered sencelessly each day on the wrong priorities ! WAKE… Lees meer »

Liza

Ja nee so gaan dit mos in Suid Afrika – lekker man lekker, 4 jaar na so ‘n geval waarin hy betrokke was, maar was dit nou andersom het jy nooit uitgekom nie, belaglik……