Foto bloot ter illustrasie van KFC. (Foto: KFC/Facebook)
Sowat 200 dae van beurtkrag in 2022 het KFC genoop om van sy takke tydelik te sluit. Sommige takke sal ook voortaan sekere disse op sy spyskaart in beperkte hoeveelhede beskikbaar hê.
Die wegneemete-reus het vandeesweek op sosiale media verduidelik dat die voortslepende kragonderbrekings die beskikbaarheid van bestanddele belemmer wat nodig is om sekere disse op sy spyskaart voor te berei.
“Ons vra om verskoning vir die ongerief en sal binnekort terug wees.”
We are sorry, but due to the ongoing loadshedding, some of our restaurants will be temporarily closed, while others may have limited availability on some of your favourite menu items.
We apologise for the inconvenience and will be back soon. pic.twitter.com/RTkWRQLDjO— KFC South Africa (@KFCSA) December 27, 2022
Dit is nie in die stadium duidelik watter takke vir eers hul deure gaan sluit nie.
Sommige sosialemediagebruikers het in reaksie op die aankondiging vertel dat hul naaste tak nie meer hoenderborsies beskikbaar het nie. Ander het weer vertel dat daar aan hulle gesê is dat daar nie enige minibroodrolletjies beskikbaar was nie.
Party sosialemediagebruikers het voorgestel dat die kitskosgroep bloot kragopwekkers aanskaf.
“Soms is dinge buite ons beheer. Die huidige beperkings is te wyte aan beurtkrag wat van ons verskaffers beïnvloed. Baie van ons restaurante het kragopwekkers om te verseker dat ons geredelik beskikbaar is,” het KFC op van die kommentaar geantwoord.
