(Argieffoto: Maroela Media)
Die polisie in die Wes-Kaap het ʼn waarskuwing vir die publiek uitgereik om nie vals klagtes aanhangig te maak nie, omdat dit op ʼn misdaad neerkom.
Kapt. Frederick van Wyk, polisiewoordvoerder, sê ʼn saak van kaping, ontvoering en diefstal is op 1 April 2022 by die Pinelands-polisiestasie aanhangig gemaak. Die saak is van die Stellenbosch-polisiestasie oorgedra.
“Die klaer het gesê dat sy motor op 29 Maart 2022 omstreeks 08:15 op die afrit by Jakes Gerwelrylaan in Epping I onklaar geraak het. Hy het aangevoer hy is deur drie mans oorval terwyl hy ondersoek ingestel het. Hy is aangerand en in die kattebak van sy motor geboender. Hulle het weggery met hom steeds in die kattebak.”
Die man het later opgemerk dat die motor nie meer beweeg nie. “Hy het om hulp geroep en ʼn onbekende man het die kattebak oopgemaak. Die man het toe glo ontdek hy is in Kayamandi, Stellenbosch.”
Hy het die motor nagegaan en ontdek dat die verdagtes sy beursie, rybewys, spaarwiel van die motor en twee skootrekenaars gesteel het. “Hy het na die Stellenbosch-polisiestasie gery om ʼn saak aanhangig te maak.”
Die saak is na Pinelands oorgeplaas en speurders het ondersoek ingestel. “Deur ʼn deeglike ondersoek is daar bevind dat die man oor die voorval gejok het. Hy het valslik ʼn saak aanhangig gemaak.”
Die man is op 8 April 2022 in hegtenis geneem op aanklag van dwarsboming van die gereg en het Woensdag vir die eerste keer in die hof verskyn.
Van Wyk sê alle voorvalle wat aangemeld word sal deeglik ondersoek word, en vals klagtes sal in dié proses opgespoor word.
Ja, so kom die waarheid altyd uit – hoop hy word ‘n les geleer.
Van meet af is daar te veel gate in sy storie ..
Siek, siek, siek!! Wat het die klaer daardeur bereik?
Mors die reeds onbekwame polisielede se tyd.
Hoekom maak mense sulke dinge op? Goeie speurwerk deur die polisie.
Boontjie kry sy loontjie
Is hy dom of is hy dom? Hy is in die kattebak toegesluit maar ontdek later dat die noodwiek weg is? Lekker lag ek nou
Wat van, die SAPD is te lui, onbevoeg en swak opgelei dat hulle weet hoe om so ‘n kapingsaak te ondersoek. Die slagoffer van die kaping is seker ook wit, so dan is ‘n ondersoek na die kaping ook nie “polities-korrek” nie.
Blinde sambok slaan hard !
Ek wonder as dit die dag regtig met hom gebeur, wat sal hy maak, en hoe sal hy voel daaroor. Jy is siek verby!!!!!!!1
Hy soek seker net aandag.
Waarom sal iemand oor so iets lieg? Ek dink nie hy weet regtig watse trauma saam so gebeurtenis gaan nie en vir hom was dit ‘n grap.