Die veelpartykoalisie in Tshwane het ooreengekom dat ActionSA ʼn mosie van wantroue in Mncedi Nzwanana, Tshwane-speaker, moet indien nadat Nzwanana in die verlede soortgelyke mosies gestuit het.
Volgens Jackie Mathabathe, koukusleier van ActionSA in Tshwane, het Nzwanana hom sedert sy verkiesing in Maart deurgaans as onbevoeg bewys en kon hy nie die basiese reëls van die raad verstaan en toepas nie.
“Die speaker het raadsverrigtinge gedestabiliseer deur sy kantoor te gebruik om partybelange te bevorder en het alle pogings om hom as speaker te verwyder gestuit.
“Hoewel ons begrip het vir bepaalde magte – dat die speaker kwessies wat in die raad ter tafel gelê word goedkeur of van die hand wys – gee sy magte hom nie die luukse om dit arbitrêr en sonder ʼn geldige rede te doen nie,” sê Mathabathe.
ActionSA glo Nzwanana se verkiesing – en die moontlike omkopery van raadslede om hom verkies te kry – was deel van Panyaza Lesufi, Gautengse premier, en die ANC se pogings om koalisieregerings voor die 2024-verkiesing te destabiliseer om meerderheidstemme te verseker.
“Daar kan geen stabiliteit in die Tshwane-raad wees wanneer die ANC-EFF-speaker aktief probeer om die pogings van die veelparty-koalisieregering – om munisipale bedrywighede in die land se hoofstad te normaliseer – te stuit nie.”
Die mosie sal na verwagting volgende Donderdag aangehoor word.
“Sou die speaker probeer om die mosie weer te stuit, sal ActionSA van regshulp gebruik maak om Nzwanana te dwing om sy optrede te wysig.
“Die verkiesing van ʼn nuwe, bevoegde speaker van die raad sal verseker dat goeie bestuur in die stad herstel word en dat inwoners die vertroue kan hê dat hul belange bo partypolitiek geprioritiseer word.”
Nou weet ek wat gebeur het met die kinders op skool wat stories aangedra het, ander beskuldig het en in die moeilikheid gebring het. Hulle is in politiek.
Ou triek van cANCer!
En hier begin die sirkus alweer – arme belastingbetalers.
Wat ‘n roesemoes van ‘n gemorsspul. Maak mens siek.
Genade, die nonsens kry net nooit einde nie!! Word al naar om van die goed te lees. “Veelpartykoalisies” is ‘n euwel in hierdie land
Ek onthou die ActionSA lamppaal-borde van die vorige verkiesing: “Moeg vir politiek? Raak ontslae van politici!” En kyk wie speel nou hardtse politieke speletjies. Die koning is kaal!
Is dit die moeite werd om ag te slaan op die gemors