Lang tronkstraf vir juffrou wat ontvoer

Tharina Human en Laetitia Nel in die hof.

Die sogenaamde baasbrein agter die opspraakwekkende ontvoering van ʼn sesjarige meisie sowat ʼn jaar gelede, is Donderdag lang tronkstraf in die Palm Ridge-hooggeregshof aan die Gautengse Oos-Rand opgelê.

Tharina Human (28) is ingevolge ʼn pleit-en-vonnisooreenkoms met die staat 15 jaar tronkstraf vir ontvoering opgelê waarvan vyf jaar vir ʼn verdere vyf jaar opgeskort is. Op die aanklag van poging tot afpersing het die hof Human vyf jaar tronkstraf opgelê. Die vonnisse word gelyklopend uitgedien. Human dien gevolglik direkte tronkstraf van 10 jaar uit.

Human se medebeskuldigdes, Laetitia Nel (41), Pieter van Zyl (51) en Bafokeng Molemohi (34) is onderskeidelik agt jaar tronkstraf, 13 jaar tronkstraf en 12 jaar tronkstraf opgelê. Al drie is vyf jaar tronkstraf opgelê vir die poging tot afpersing. Die vonnisse word gelyklopend uitgedien.

Pieter van Zyl.

Vyf jaar van die drie se vonnisse vir ontvoering is vir vyf jaar opgeskort. Nel sal dus vyf jaar agter tralies deurbring, Van Zyl agt jaar en Molemohi sewe jaar.

Die vier het ter strafversagting onder meer aan die hof gesê hulle het diepe berou oor hul optrede, dat hulle opreg jammer is oor die hartseer wat hulle die jong slagoffertjie en haar uitgebreide familie veroorsaak het. Hulle het aangevoer die kind is binne 24 uur ná die ontvoering fisiek ongedeerd aan haar ouers terugbesorg en dat hulle eindelik geensins by die misdaad gebaat het nie. Hulle het aangevoer hulle het die hof in hul vertroue geneem en die staat die moeite en koste van ʼn uitgerekte verhoor gespaar.

Bafokeng Molemohi.

Die dogtertjie, destyds ses jaar oud, is aanvanklik op 2 September verlede jaar voor Laerskool Kollegepark in Vanderbijlpark, waar sy en haar boetie leerders was, by haar ma gegryp. Haar pa is beveel om ʼn losprys van R2 miljoen vir die kind se vrylating te betaal. Sy is sowat 18 uur later ongedeerd gevind.

Human, Nel en Van Zyl is twee dae ná die dramatiese ontvoering in hegtenis geneem en Molemohi sowat drie weke later.

Adv. Salome Scheepers, staatsaanklaer, het aangevoer die kind is gewelddadig by haar ma gegryp en daarna aan haar eie genade in ʼn gevaarlike gebied gelaat voordat weldoeners haar daar gevind het.

Tharina Human en Laetitia Nel in die hof.

Volgens Scheepers is die meisie geweldig getraumatiseer en weier sy onder meer om in haar eie bed te slaap. Die dogtertjie en haar boetie moes weens die trauma van die voorval van skool verander. Die meisie se pa sukkel boonop self om te slaap omdat hy deurentyd voel hy moet wakker bly om sy kinders te beskerm.

Scheepers het voorts aan die hof gesê die kind se pa en sy familie het die ma van betrokkenheid by die ontvoering verdink.

Die dogtertjie se pa se regsverteenwoordiger en jarelange vriend, Ockert Vermaak, het na afloop van die hofverrigtinge ontken dat dit die geval is. Die ma en pa se huwelik het wel sedertdien verbrokkel en die kinders woon in hierdie stadium by hulle pa.

Laetitia Nel.

“Ons is bly dit is verby. Ons as gesin, ek en die kinders, kan nou aanbeweeg en vorentoe beweeg,” het die meisie se pa gesê.

Volgens hom gaan hulle nou verder werk om die dogtertjie te help om die gebeure te verwerk en dit agter haar te sit “sodat dit ʼn gedagte van ʼn paar jaar terug word, nie ʼn ding wat die heeltyd by haar spook nie,” het hy gesê.

Hy het gesê dit is belangrik dat die kind weer ʼn normale lewe kan geniet en nie gedurig met die vrees rondloop dat sy dalk weer gesteel kan word nie. “Ek glo geregtigheid het geskied,” het hy oor die pleitooreenkoms gesê.

Human se pa wou nie kommentaar lewer nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Herpiet

Sjoe, moordenaars hom met ligter strawwe weg…

sterk soos n beer

ek is tevrede met tharina human se vonnis. eks bly sy is lewenslank uit onderwys geskors.

MCH

Mooi so.

Cherokee

Ek kry nie plek in my om so selfvoldaan soos die res daaroor te klink nie. Hulle het ‘n dom ding gedoen wat hulle lewenslank gaan berou, maar dit kan nie vergelyk word, nie eens in dieselfde asem genoem word, met die werklik bose dinge wat in Suid Afrika gebeur.

Piet

Yo, dis ‘n strawwe vonnis.