Levubu-plaasmoord: Boer het glo probeer vlug

Hennie Bonnema. Foto: Verskaf

Hennie Bonnema. Foto: Verskaf

Hennie Bonnema, die boer wat Dinsdagaand op sy plaas in die Levubu-omgewing vermoor is, het moontlik onraad vermoed en probeer vlug kort voordat hy deur sy aanvallers oorval is.

Maroela Media het vroeër berig Bonnema (62) se bebloede liggaam is omstreeks 23:00 deur sy seun en skoondogter buite sy plaashuis gevind.

Jan Bonnema, Hennie se broer, het Woensdag aan Maroela Media gesê aangesien Hennie alleen was toe hy aangeval is, is dit nie heeltemal duidelik wat presies gebeur het nie en probeer hulle nog die gebeure uitpluis. “Hy het die aand by my suster en swaer gaan eet en is omstreeks 21:30 by hulle weg. Ons het ʼn reëling dat ons altyd mekaar laat weet as die ander een veilig by die huis is, maar Hennie het nooit laat weet hy is tuis nie,” het Jan gesê.

Nadat Hennie nie sy telefoon geantwoord het nie, het sy suster een van sy seuns, Hendrik, gebel. Hendrik en sy vrou is na die plaas om ondersoek in te stel en het Hennie se liggaam op die trappe naby die huis aangetref.

“Die huis het ʼn heining en ʼn elektriese hek. Ons vermoed Hennie het ingery en by die motorhuis het iets hom gepla, hy het onraad vermoed. Hy het omgedraai en probeer om weer uit die erf te ry, maar voor die hek het hulle hom oorval. Hy is daar met ʼn skerp voorwerp gesteek en geslaan en is daar dood,” het Jan gesê. “Die aanvallers het vermoedelik daarna sy liggaam gesleep tot by die huis, waar hy gevind is. Dit is nou maar ʼn raaisel hoekom hulle dit gedoen het.”

Volgens Jan het die aanvallers vermoedelik Hennie se huissleutels gebruik om die agterdeur oop te sluit om toegang tot die huis te kry. Hulle het gevlug voordat enigiemand hulle gesien het. “Ons dink terwyl Hendrik by die voordeur by Hennie was, het die aanvallers by die agterdeur uitgevlug,” het Jan gesê. Dit is nog nie duidelik wat uit die huis gesteel is nie.

Hennie het saam met sy seuns, Hendrik en Pieter, met avokado’s, piesangs en makadamianeute geboer. Hy het alleen gebly nadat sy vrou, Nelia, in 2013 aan kanker oorlede is.

Jan woon op ʼn plaas ongeveer 2km verder. Maroela Media het verlede jaar berig oor Jan en sy vrou, Elize, wat ook op hul plaas aangeval en met pangas geslaan is. Hulle is ná die aanval in die hospitaal opgeneem, maar die volgende dag weer ontslaan.

Kol. Ronel Otto, woordvoerder van die polisie, het die moord op Hennie bevestig en gesê niemand is nog in hegtenis geneem nie.

Geen begrafnisreëlings is nog getref nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

37 Kommentare

jongste oudste gewildste
Walter

Ek raak nou goed gatvol vir die land.

vierkleur

My bloed kook.
My mense word uitgemoor. Hoe lank nog kan ons die vertrapping van ons volk verduur?

Theresa B

Ek stem Acca. Dis asof hierdie tipe optrede deel is van hul dagtaak??!!

Sydney

Acca, nou hoekom wil jy raai. Ons almal weet dit al lankal wie ons boere dood maak. Kom ons wees eerlik nog werklose mense wat die toekoms in gaan………..

Grassie

Die lafaards teiken meeste van die tyd bejaardes. Dit is in lyn met Marxisme se militêre strategie – val die weerloses meedoënloos aan en vlug skaamteloos van die sterkes.