Motsoeneng skuif na dié pos in SAUK

Motsoeneng tydens Dinsdag se mediakonferensie.

Motsoeneng tydens Dinsdag se mediakonferensie.

Die SAUK het Dinsdag tydens ʼn mediakonferensie aangekondig dat Hlaudi Motsoeneng, die uitsaaier se voormalige omstrede bedryfshoof, herontplooi word.

James Aguma, die SAUK se waarnemende uitvoererende hoof en finansiële hoof, het aangekondig dat Motsoeneng steeds ʼn werknemer van die SAUK is en dat hy voortaan sal dien as groepbestuurder vir korporatiewe sake, ʼn pos wat hy voorheen beklee het.

Aguma het gesê die openbare uitsaaier ontvang baie klagtes maar neem dit nie ernstig op nie. Prof. Obert Maguvhe, voorsitter van die SAUK-raad, het gesê daar is ʼn persepsie dat die openbare uitsaaier nie die howe of Openbare Beskermer respekteer nie. Volgens Maguvhe is dit egter onwaar en het hulle interne verhore gehou teen Motsoeneng soos vereis, maar was die publiek nie gelukkig met die uitkoms nie.

Maguvhe het gesê hulle het regter Dennis Davis sê uitspraak bestudeer en volgens dié uitspraak kan Motsoeneng enige pos in die SAUK beklee, insluitend bedryfshoof, indien daar aan die nodige vereistes voldoen word. Davis het bevind Motsoeneng se aanstelling as bedryfshoof was onwettig en irrasioneel.

Maguvhe het ook ʼn beroep op “ander partye” gedoen om nie in te meng en die SAUK te “destabiliseer” nie. Hy het gesê Motsoeneng kan vir die pos van bedryfshoof aansoek doen wanneer dit geadverteer word.

Motsoeneng het ʼn hoed gedra tydens die konferensie en tydens sy spreekbeurt gesê dit is sy nuwe styl vir sy nuwe rol by die SAUK. Volgens hom is sy nuwe posisie van kritieke belang en hy sal daarop fokus om inhoud in al 11 amptelike tale beskikbaar te maak. Motsoeneng het gesê hy sal weer vir die pos van bedryfshoof aansoek doen sodra dit geadverteer word.

Mediaberigte het aan die lig gebring dat Motsoeneng onlangs ʼn bonus van R11,4 miljoen ontvang het, slegs een deel van ʼn verwagte R33 miljoen-uitbetaling oor die volgende drie jaar.

Die appèlhof het verlede week Motsoeneng se aansoek om verlof tot appèl teen Davis se uitspraak, met koste van die hand gewys.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ’n vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Die kommentaar op hierdie berig is gesluit. Kom kuier gerus lekker verder saam op ʼn ander artikel.

38 Kommentare

jongste oudste gewildste
Cherokee

Hoor net hoe stil is ons. Besig om die nuutste verwikkelinge te bestudeer alvorens kommentaar gelewer sal word.

JG PRETORIUS

Die man is duidelik baie lief vir homself en sy stem. Darom die nuus konferensie om homself op te hemel as die beste wat die Sabc ooit beleef het.

William

Kan ek ook n pos by die SABC kry asb.

Sê net

En so bly hy die soustrein ry.

007

Het hy ooit graad 10 gedoen??