MRK beslis Malema-uitsprake nié haatspraak

Julius Malema is berug vir sy omstrede uitsprake. Foto: Jonisayi Maromo/ANA

Kommerwekkend, maar nié haatspraak nie. Só het die Menseregtekommissie (MRK) bevind oor verskeie omstrede uitsprake van die EFF-leier, Julius Malema.

Die MRK het gesê hy het sedert 2016 vyf klagte teen Malema en die EFF ontvang. Die kommissie sê hoewel Malema nie ʼn oortreding begaan het nie, is hy steeds bekommerd oor die politikus se uitsprake.

Die klagte by die MRK het ingesluit Malema se uitlating dat die EFF “nie vir die slagting van wit mense vra nie, ten minste nie nou al nie”. Malema het dié gewraakte woorde in November 2016 buite die Newcastle-landdroshof kwytgeraak kort nadat hy in die hof verskyn het.

Die MRK het bevind hoewel die woorde kwetsend kan wees, moet dit binne konteks beskou word. Die kommissie sê Malema het gesê wit mense sal nie onder sy leierskap doodgemaak word nie.

Die kommissie het ook bevind ʼn twiet deur EFF-LP Godrich Gardee, waarin hy na DA-leier Mmusi Maimane as ʼn “garden boy” verwys, was beledigend maar nie haatspraak nie. Die kommissie sê die opmerking is gemaak binne die konteks van ʼn ras- en geskiedkundige agtergrond.

Voorsitter Bongani Majola sê hoewel iemand aanstoot kan neem deur ʼn spesifieke uitlating, dit nie die stelling outomaties haatspraak maak nie.

Die MRK sê hy doen sy werk sonder vrees of vooroordeel en maak sy bevindings ingevolge wetgewing. Diegene wat ontevrede met die bevindings is, kan dit in ʼn hof laat hersien.

Die MRK se uitvoerende hoof, Tseliso Thipanyane, sê ook hoewel die uitsprake nie haatspraak is nie, Suid-Afrikaners hulle moet gedra in ʼn kultuur wat van menseregte getuig.

VF Plus-voorsitter Anton Alberts het die party se teleurstelling in die bevinding te kenne gegee. Hy sê die party gaan die uitspraak bestudeer en dan op ʼn moontlike appèl besluit.

“Die MRK is oor jare al besig om met selektiewe optrede en besluitneming oor haatspraak sy eie geloofwaardigheid te ondermyn. Wanneer mense soos Malema of Andile Mngxitama, leier van die BLF, onaanvaarbare uitsprake maak, sal die MRK oënskynlik eers optree ná groot druk van die publiek en ʼn party soos die VF Plus wat amptelike klagte indien,” sê Alberts.

“Die kwessie van ras is gevoelig en verdelend soos die MRK self vandag erken het, en dié liggaam moet daarom verantwoordelikheid neem vir die rassistiese uitsprake, haatspraak en opsweping tot geweld van persone soos Malema en Mngxitama weens jare lange versuim om op te tree.”

Alberts sê bevindings soos dié sterk mense in hulle kwaad om rasseverdeling te skep.

Die EFF het op sy beurt die bevinding verwelkom. Woordvoerder Mbuyiseni Ndlozi sê diegene wat die klagte teen Malema ingedien het, wil geldige kritiek onderdruk wat die samelewing moet help om sy probleme te oorkom. “Diegene wat die debat oor grondonteiening wil stopsit, wil ook die stemme stilmaak van diegene wat krities is oor wit bevoorregting. Hulle wil ook die debat stopsit oor die mishandeling van Afrikamense deur Indiese base,” lui ʼn verklaring van die EFF.

Ndlozi sê ongeregtighede moet daadwerklik reggestel word, eerder as om te kla oor haatspraak wat nie bestaan nie.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

43 Kommentare

jongste oudste gewildste
Irma

So sorg die boeties vir mekaar. Dit wil regtig lyk of begrip, redenasie en eerlikheid in sommige kringe ‘n skaars vermoë of kwaliteit is. Kyk rond broeders, hoe lyk die samelewing vir julle. Julle dra net verder by tot verdeeldheid en as ek dit mag kwytraak, ‘n mislukte staat.

Lerato

Menseregte vir watter mense?
Wie klasifiseer MRK as mense?
Het MRK regtig bestaansreg?

Judge Dredd

MRK se eie rassisme onderrok hang uit.

Ek het dit voorheen gese en ek sal dit weer se.

Wittes is te beskaafd – Daar sal eers na rassime teen wit mense gekyk word as wittes betoog deur in die strate rond te spring en geboue af te brand.

Henry

Het enige iemand ‘n ander uitspraak verwag? Die MRK is ‘n eenogige, tandelose en impotente instansie wat myns insiens hulle deure gerus kan toemaak. Wat ‘n grap!

My c

Maar as Jan Botha dit gese het was dit haatspraak!!!