MRK swaai om oor besluit oor haatspraak-klagte

Een van die inskrywings wat die DA na die Menseregtekommissie verwys het.

Die Menseregtekommissie (MRK) het Woensdag omgeswaai oor sy besluit om nié inskrywings op sosiale media te ondersoek waarin geweld teen boere aangehits word nie. Die kommissie het nou gesê hy sal minstens een strafsaak, na aanleiding van die klagtes oor die plasings, by die polisie aanhangig maak.

Hierdie 180  ̊-ommeswaai van die MRK volg ná vele druk van die DA en die massa-verontwaardiging van lede van die publiek wat nie met die kommissie se aanvanklike besluit saamgestem het nie.

Maroela Media het vroeër berig die MRK het die klagtes teen die plasings op sosiale media summier verwerp en gesê die polisie is in ʼn beter posisie om dit te ondersoek. Die kommissie het aangevoer hoewel hy saamstem dat hierdie soort inhoud onaanvaarbaar en onregmatig is, is dit ʼn misdaad wat deur die polisie ondersoek moet word.

Die DA het die afgelope maand verskeie van dié inskrywings op sosiale media wat oënskynlik plaasmoorde en -aanvalle verheerlik na die MRK verwys om as haatspraak ondersoek te word.

Die MRK het Dinsdag gesê hy het nie hulpbronne om mense op te spoor en te beboet vir die haatspraakinskrywings nie.

Volgens die DA is die MRK se besluit om nie die plasings te ondersoek nie, en die redes wat hy daarvoor aangevoer het, in teenstelling met verskeie ander sake wat hy al vantevore ondersoek het.

Nog een van die inskrywings wat na die MRK verwys is.

Dianne Kohler Barnard, die DA se woordvoerder oor staatsveiligheid, sê twee lede van die kommissie se tak in Kaapstad het die DA sedert Dinsdag genader om verskoning te vra vir die kommissie se terugvoer oor die plasing. Hulle het bevestig dat die versoek om die uitlatings te ondersoek en vervolg onder die aandag van die kommissie se nasionale kantoor gebring sal word.

“In die kommissie se brief aan die DA het die Wes-Kaapse kantoor erken hy was versigtig om die klagtes te aanvaar. Tóg het die MRK dit heeltemal duidelik gemaak dat hy verkies om nie die families van die moordslagoffers van boere en plaaswerkers te verteenwoordig nie,” sê Kohler Barnard.

Kohler Barnard sê die DA vertrou dat die kommissie van nou af sy mandaat ernstig sal opneem en die blatante misbruik van menseregte en haatspraak spesifiek rakende plaasaanvalle en -moorde onder die loep sal neem.

“Geweld en haatspraak teen sekere rassegroepe kan nie geduld word nie. Indien sulke voorvalle voorkom, moet dit ondersoek en die skuldiges gestraf word.”