Nou dreig staking in veiligheidsbedryf

(Argieffoto: pixabay)

Nadat ʼn grootskaalse staking in die bankbedryf Donderdag afgeweer is, dreig die veiligheidsbedryf om te staak nadat loongesprekke ʼn dooiepunt bereik het.

Sewe vakbonde eis hoër lone en die inwerkingstelling van hospitaaldekking vir veiligheidswagte. Hulle het werkgewers se aanbod van ʼn 1,1%-verhoging van die tafel gevee en sê dit kom neer op ʼn verhoging van 23 sent per uur vir sogenaamde Graad C-veiligheidswagte.

“Gegewe die aanbod op die tafel is dit duidelik dat werkgewers nie ʼn meningsvolle rol wil speel om die lewensomstandighede van veiligheidsbeamptes te verbeter nie. Vir veels te lank het bedryfsleiers die hele ent bank toe gelag, terwyl werkers in skuld verdrink omdat hulle dit nie eens naastenby kan regkry om liggaam en siel bymekaar te hou nie,” het die vakbonde in ʼn gesamentlike verklaring gesê.

Die vakbonde sê bedryfsprotokol bepaal dat nadat onderhandelings doodgeloop het toe vakbonde die 23 sent-aanbod van die hand gewys het, alle partye aan ʼn verpligte mediasieproses moet deelneem. Dit is geskeduleer vir 1 en 2 Oktober.

Sou dié proses ook nie ʼn oplossing oplewer nie, word ʼn gesamentlike belangdispuut na die Kommissie vir Versoening, Bemiddeling en Arbitrasie verwys.

“As dít ook nie op ʼn skikking uitloop nie, word ʼn sertifikaat uitgereik wat werkers toestemming gee om te staak,” het die vakbonde gesê.

Die loononderhandelings het al op 15 Augustus by die bedingingsraad begin.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

22 Kommentare

jongste oudste gewildste
Rina

Ure op hul bene ….. kry peanuts vir n salaris ……….. ek gun julle 11 persent

Koos de Meyer.

Hoe belaglik. 1.1 persent. Dis nie eers die papier werd waarop dit geskryf is nie.

Marinda

Skande wat hierdie mense betaal word. En daagliks is hulle lewens in gevaar vir ñ stipend.

Elna

Ek stem saam met al die bo genoemde kommentators. Hulle verdien n baie beter salaris want hulle doen hulle werk wat die SAPD veronderstel is om te doen. Hulle moet baie meer voordele kry

P

Ek stem hulle verdien die 11%. My seun self in gewapende reaksie, werk 12 Ure skofte en moet baie tyd aanbly vir ‘n 18Uur skof. Is 100% van die tyd eerste op enige noodgeval doen die SAPS se werk vir hulle en moet dae wag vir SAP om op te daag. Daar is self al gevalle gewees wat SAP gesê het hulle gaan nie uit kom nie area is te gevaarlik. Kry ongelooflik min salaris maar werk is werk en mens moet doen wat jy moet om te oorleef.