Nzimande beloof miljarde se beurse

Blade Nzimande (Foto: ANA/Jacques Naude)

Die nasionale beursskema vir studente van families wat minder as R350 000 per jaar verdien, sal oor die volgende drie jaar ʼn inspuiting van R102,4 miljard ontvang, het Blade Nzimande, minister van hoër onderwys, wetenskap en tegnologie, Vrydag gesê.

Nzimande het gesê die nuwe beursskema, wat verlede jaar ingestel is, sal teen 2022 ongeveer die helfte van alle studente by staatsuniversiteite dek, soos dit jaarliks aan nuwe studente beskikbaar gemaak word.

“Dit sal oor vyf jaar by universiteite ingefaseer word,” het hy tydens die begrotingsrede in die parlement gesê.

Die belegging in arm- en werkersklasstudente oor die 2019 mediumtermynbegrotingsraamwerk beloop R82 miljard vir universiteitstudente en R20,4 miljard vir TVET-kollegestudente. Die skema word geadministreer deur die nasionale finansiële hulpskema vir studente (NSFAS), wat in Augustus onder administrasie geplaas is.

Nzimande het gesê sedert die administrateur aangestel is, was daar “beduidende vordering in die bedrywighede van die skema” en dit het ʼn meer doeltreffende studenteregistrasieproses aan die begin van die jaar beteken. “Die fokus is om die onmiddellike korttermynstabiliteit van NSFAS te verseker en doeltreffende beleide en stelsels in plek te stel om seker te maak dat studente, wat daarvoor kwalifiseer, betyds die finansiering ontvang en dat hulle doeltreffend ondersteun word om suksesvol te wees in hul studies.”

Hy het gesê ʼn spesiale ministeriële span sal oor die volgende paar maande aangestel word om probleme in die beleid en kapasiteitsprobleme te assesseer.

“Ons sal nou met NSFAS werk om ʼn gladde oorgangsperiode tussen die administrateur en die nuwe bestuur en bestuurspanne van NSFAS te verseker.”

Belinda Bozzoli, LP van die Demokratiese Alliansie, het gesê dit is onmoontlik om ʼn begroting goed te keur vir ʼn departement wat só toegeeflik is dat entiteite soos NSFAS, “ʼn R30 miljard-organisasie”, herhaaldelik versuim om die parlementêre portefeuljekomitee van hoër onderwys op hoogte te hou van hoe hul finansies bestuur word. “Dit lyk nie of dit ons kollegas in die ANC pla nie,” het sy gesê.

ondersteun maroela media só

Sonder Maroela Media sou jy nie geweet het nie. Help om jou gebalanseerde en betroubare nuusbron se toekoms te verseker. Maak nou ʼn vrywillige bydrae. Onthou – ons nuus bly gratis.

Maak 'n bydrae

Nou pra' jý

O wee, die gesang is uit! Kommentaar word ná 48 uur op ʼn artikel op Maroela Media gesluit. Kom kuier gerus verder op ʼn meer onlangse artikel.

39 Kommentare

jongste oudste gewildste
Piet

Party mense in die Regering praat van groot bedrae geld asof Suid-Afrika onbeperkte bronne het. Waar gaan al gegradueerdes werk kry eendag?

Johanna Botha

Ja met geld wat jy waar kry ! ?

Mel

Mag my blanke kind ook aansoek doen? Vra net…..

Dries

Wat 90% van di bevolking steeds ni verstaan ni, is dat absoluut niks ‘gratis’ is ni. ‘Gratis’ beteken slegs dat geld van elders, vir n spesifieke doel (hier beurse) aangewend word, om sodoende weer n tekort vir n heel ander doelwit te skep…

Leon - Centurion

En dan met ‘n BA in die tuin werk.